Aba sickle cell e Luweero bakuzizza olunaku lwabwe

ABAANA abawera 1,321 be bafuna obujjanjabi bw'obulwadde bwa sicle cell e Kasana mu Luweero ne basaba gavumenti eyiwe ensimbi ku bulwadde buno nga bwekola ku bwa mukenemya kuba bangi bubasse olw'okubulwa obujjanjabi.

Basinzidde ku kiliniki yaabwe e Kasana mu Luweero nga bajaganya okuweza emyaka 10 bukya etandikibwawo ne bategeeza nti yabajuna nti kyokka okuva eyagitandikawo lwe Covid 19, bangi ku bannabwe babafuddeko olw'okubulwa eddagala nga n'omusaayi okugufuna zibeera nduulu.

Ester Najjunju (30) agambye nti wadde ab'ekyalo baali bagamba nti wa kufa mangu olw'okulwala okw'olutentezi nti kyokka asobodde okuwangaala n'ekirwadde kino lwa bakaddebe kumufaako nga bamuwuuba mu malwaliro, okulya ebibala n'enva endiirwa n'asaba gavumenti eyongere eddagala mu kiliniki yaabwe nga bwekola ku siriimu.

Akulira kiliniki eno Sr. Doreene Margaret Nannyojo ategeezezza nti basomesezza abantu okwekebeza ekirwadde kino n'okukubiriza okueeta abaana ababulina okufuna obujjanjabi buli lwa kubiri okufuna obujjanjabi ne babasomesa engeri y'okubalabiira basobole okuwangaala.
Omyumyuka wa ssentebe wa disitulikiti ya Luweero era nga y'atwala eby'obulamu Christine Nakamaanya awadde abafumbo amagezi baleme kwekebezanga siriimu yekka wabula ne sickle cell baleme kugwebwako mirembe nga bazadde baana abalina obulwadde buno.

Asabye abaami obutalekera bakyala baabwe baana bano ne batuuka n'okudduka mu maka wabula bakwatagae okubalabirira