Olutalo lw'emidaali mu mizannyo gya AUUS lulinnye enkadaggo

OLUTALO lw’emidaali mu mizannyo gya AUUS egiyindira ku Uganda Christian University (UCU) e Mukono, lulinnye enkandaggo nga yunivasite 22 ezeetabyemu zirwana okukomekkereza n’obuwanguzi.
Kampala University y’emu ku zikyaleebya oluvannyuma lw’ennaku ssatu ng’emizannyo giyinda. Baakawangula omugatte gwa mudaali 13 okuli; egya zaabu 3, ffeeza 5 n’egyekikomo 5.
Mu karate Helda ne ‘Group fight’ baawangudde zaabu 2, Flora Aluel ne Stacy Simaly baatutte ffeeza 2 ate Brenda Nankya ne Gloria Kiden ne bawangula egw’ekikomo buli omu.

Gloria Ayaa, owa She Cranes ne Kampala University n'omupiira nga battunka ne Kyambogo

Okuwuga; Edgar Tendo yeetisse gy’ekikomo ebiri, yatutte mu mutendera gwa ‘Free style ne Back stroke (100m ne 200m)’.
Emisinde; Monica Akullo (400m ne 100m), Jimmy Onekgiu (1500m), baawangudde ffeeza buli omu ate Priscilla Akello n’awangula ogw’ekikomo mu 1500m.
Mu Woodball baafunye omudaali gwa zaabu ogwawanguddwa ttiimu y’abasajja (Team stroke). Ate abakazi bazannya Bugema University ku semi.
Okubaka; abawala beesozze semi oluvannyuma lw’okukuba Kyambogo (56-16) ku mutendera gwa ‘quarter’.
Volleyball; abasajja beesozze fayinolo oluvannyuma lwokukuba Kampala International University (sets 3-1). Ate abakazi beesozze semi oluvannyuma lw’okukuba Kyambogo (Sets 3-2) ku ‘quarter’.

Abazannyi ba Kampala University mu handball nga battunka ne UCU (Kla yawangudde 31-21)

Omupiira; abasajja beesozze ‘quarter’ oluvannyuma lw’okumalira mu kyokubiri n’obubonero 7 mu kibinja B ekyakulembeddwa St. Lawrence University ku bubonero 12.
Abakazi abazannya omupiira gw’ebigere balwanira kifo kyakusatu nga bazannya Nkumba, ssinga bawangula bajja kusitukira mu mudaali gw’ekikomo.
Mu Handball; abasajja beesozze semi fayinolo oluvannyuma lw’okukuba Mbarara University of Science and Technology (31-20) ate abakazi beesozze semi oluvannyuma lw’okukulembera ekibinja n’obubonero 6