Isabirye anyize omuzungu wa SC Villa ebitoliro n'amusuuza obubonero 3!

OMUTENDESI wa BUL FC omuggya, Alex Isabirye Musongola ayongedde okulaga eryanyi bw’anyize SC Villa ebitoliro ku kisaawe kya FUFA Technical center e Njeru n’agisuuza obubonero busatu bw’agiwangudde ggoolo 2-1.

Ku Lwkutaano BUL FC yazze mu mupiira guno nga y’esinga obunafu, yabadde erwanisa butasalwako ku bubonero 13 bwokka, ate SC Villa yabadde n’obubonero 26 ng’enoonya wiini okulinnya ku ntikko ya Star Times Uganda Premier League, okusiguukulula Vipers SC, Police FC ne KCCA FC abasibaganye ku bubonero 27 ku ntikko ya liigi, wabula BUL FC yagiremesezza.

Ttiimu ya BUL FC bw'efaanana.

Isabirye yakomyewo ng’omutendesi wa BUL FC omulundi ogw’okusatu nga December 29, 2025, guno gwabadde mupiira gwe ogwokubiri mu mitambo gya ttiimu eno. Yasooka kumegga Calvary SC (1-0) wiiki bbiri emabega.

Ggoolo y’omuzibizi wa BUL FC Nicholas Mwere mu ddakiika ey’e 73 ye yakutudde SC Villa. Alex Kitatta ye yasoose okuteebera BUL FC mu ddakiika ey’e 32 wabula SC Villa yafunye ey’ekyenkanyi ng’eyita mu Reagan Mpande mu ddakiika ey’e 65 wabula teyasobodde kutaasa.

Obuwanguzi bwa BUL bwagisuumusizza n’edda mu kifo kya 7 n’obubonero 16, ezzaako kukyalira Lugazi FC ku Lwokuna (January 27).

“Omupiira gubadde mugumu, okufuna obubonero 3 ku SC Villa naye abazannyi mbeebaza kuba ebiragiro babitadde mu nkola ate ne Katonda n’atuyamba, kati tuzzaako Lugazi, twagala bubonero 3 era tugenda kwongera okwewagala,” Isabirye bwe yategeezezza.