Ttiimu eyalera bassita ba Cranes eyagala FUFA eyambeko mu by’ensimbi

Ssentebe wa Lukuli Hearts United Issa Ngugwa agamba nti ensamba y’omupiira FUFA gye yaleeta mu sizoni ya 2025-26 gye bakozesa mu kibinja eky’okusatu eky’omupiira gwa Uganda agamba nti yabayambako kinene engeri gye mwalimu okuvujjirirwa ku kasente nga mu kiseera kino basomoozebwa olwenkyusa y'ensamba.

Bano bannyonnyodde okusomoozebwa kwe bayitamu  ne basaba n'ebirina okukolebwa naddala okutereeza omupiira naddala mu ttiimu ezikula.

Ttimu Ya Lukuli Hearts United

Okusomozebwa ttiimu kw'efunye mu bbanga ly'ebaddewo.

Okusomozebwa mu by'enfuna ng'ebireeta ssente bitono nga ssente ze bakozesa ebiseera bino ziva mu kwesonda n’okugattirira okuva mu batandiisi nga mu kiseera kino ebyetagisa bingi nga ne ssente 1,200,000 ezeetaagisa okwewandiisa nga sizoni etandiika nazo zikyabeekubya mpi.

Lutwama agamba nti okubatwalako abazanyi ku busente obutono ddala nakwo kusomoozebwa kunene, olwokuba abaana abakozesebwa okusamba mu ttiimu baana baakukyalo abasomoozebwa mu by'enfuna, ttiimu endala zanguwa okubabbako ssente nga tebabasasudde ssente zibagwanira olw'okuva mu famire enjavu.

Ttiimu Ya Lukuli Hearts Mu Kifaanayi

Agamba nti n'emisolo emingi egiggyibwa ku bintu ebikozesebwa mu by'emizannyo, gavumenti erina okugikendezaako kubanga ebyemizannyo byettanibwa abavubuka ate nga guno gwe mulimu mwe basobola okwefunira ssente.

Ebikwata ku Lukuli Hearts United

Steven Lutwama akulira eby'emirimu mu Lukuli Hearts United annyonnyola nti ttiimu eno yatandikibwawo mu 1958 oluvannyuma lwa Ssekabaka Edward Muteesa II okukyalirako mukwano gwe George Kiyunga  e Lukuli ne basambamu ku kapiira nga wano we yabaweera yiika z’ettaka ttaano kwe baateeka ekisaawe ky’omupiira kati kye bakozesa.

Steven Lutwama (kkono) Ne Isa Nguggwa ( Ku Ddyo)

Ttiimu yatandikibwa era mu mwaka gwa 1962 lwe baafulumya omusambi w’omupiira ku ttiimu y’eggwanga George Bukenya nga mu kusooka yayitibwa Lukuli United ng’okujikyusa erinnya okujituuma Lukuli Hearts United kwali kwa 2002.

Agamba okuva mu mwaka gwa 1962, ttiimu yaliwo naye nga tesamba mu mpaka za kuvuganya okutuusa mu mwaka gwa 1993 we yatandikira okuzannyira mu kibinja ky'omupiira eky'okubiri mu ggwanga.

Abazannyi Ab'amaanyi Lukuli Hearts B'efulumizza

Abazannyi bano kuliko; Nestroy Kizito, Hassan Mubiru, Phillip Ssozi, Moses Ndawula, Yuda Mugalu, Augustine Nsamba, Habib Kavuma, Ayub Kisaarita, Wasswa Richard Sseruyange, God Mugwanya n'abalala.

Abamu Ku Baana Bano Nga Batendekebwa My Akademi Ya Ttiimu Eno

Ebituukiddwaako ttiimu mu myaka gyayo

Ng'oggyeeko abazannyi abaamaanyi ttiimu b'efulumiza, kuliko n'abatendesi omuli; Richard Wasswa, Phillip Ssozi, Hassan Mubiru, Kabanda Micheal, Moses Musoke, gattako n'abakulembeze abenjawulo okuli Eddie Lwanga, Hassan Kirunda, Steven Lutwama nabalala.

Ebiruubirirwa

Steven Lutwama agamba mu kusooka ekiruubirirwa kyali kya kutumbula bitone nga tebafudde nnyo ku biruubirirwa bya ttiimu naye nga kati mu kiseera kino batunuulidde kuyimusa bitone n’ekifaananyi kya ttiimu yonna.

Ekisaawe Kwe Basambira

Ettendekero ly'abaana mu ttiimu, ebimu ku biruubirirwa ebinene ebya ttiimu eno kwe kusitula ebitone by'abaana abato kye batandiikako edda nga bayita mu 'Toronto City Soccer Academy' n'ekigendererwa ky'okusitula ebitone by'abaana abato.

Era nga kino kiyambyeko n'okusomesa abaana abato nga bayita mu kuweebwa bbasale ku lw'ebitone bye boolesa.

Ekisaawe

Ekisaawe ekikozesebwa ky'e Lukuli era nga kino kituuza abantu 500 okujjula omupiira bwe gubeera nga gulimu okuvuganya n'ebbugumu.