Hiika 600 z’ebisharara ebyataahiriirwe omuri Ruhaama bigaruziibweho.

N’ebya Fred Turyakira

NTUNGAMO

Ab’obushoborozi omu disiturikiti eya Ntungamo batandikire ehururu y’okugaruzaho hiika 600 z’ebisharara ebyacwekyereziibwe omu byaro ekya Kyabwato na Rwengwe omu gomborora eya Rukoni West omu eishaza erya Ruhaama.

Aharw’okubanza, abakuru kuruga omu kitongore ky’eby’obuhangwa aha disiturikiti beebembiirwe orikukurira eby’obuhangwa Dinah Tumwebaze, Diisi Mathew Ndifuna, orikukurira eby’okwerinda omunda ya disiturikiti Nsimire Esau hamwe na RDC Geoffrey Mucunguzi, bigwireho emifuregye y’amaizi, batema emiti hamwe n’entookye kubaasa kugaruzaho ebisharara.

Ebisharara ebindi ebigaruziibweho harimu hiika 700 z’ebisharara omu gomborora eya Rweikiniro hamwe na hiika 800 z’ekisharara omu gomborora eya Kayonza.

Ntungamo n’emwe ahari za disiturikiti nyingi omu eihanga ezirikukira kuteganisibwa omwegyemure hamwe n’okuteganisibwa ekyanda kiringwa ebirikureetwa eempinduka y’obwire, ebiine kukorwaho.

Tumwebaze naagira ngu okutaahiriira eby’obuhangwa kureteire entindo zoona zatwarwa amaizi, omushenyi kwijurirana omu maziba hamwe n’okureetaho omwegyemure.

Hiika 600 z’ebisharara ebyataahiriirwe omuri Ruhaama bigaruziibweho.

Tumwebazi akyorekire ngu disiturikiti ya Ntungamo etungire shiringi miriyooni 68 kuruga omu purogyekiti eya Green Climate Fund kubaasa kukora aha bintu 3 omuri okugaruzaho eby’obuhangwa, okutaho emiringo endijo ey’okuhwera abantu abarikutuura omu myanya y’ebisharara kukora purogyekiti ezitarikushisha eby’obuhangwa hamwe n’okuheereza abahingi n’abariisa amakuru g’eby’obuhangwa omu bwire.

Tumwebaze naagira ngu oihireho okugaruzaho hiika 600 z’ebisharara omu kyaro ekya Kyabwato na Rwengwe, babaasize kugaruzaho obucweka 50 ahari 100 bw’ebisharara ebyataahiriirwe omu disiturikiti.

Orutindo rwa Kyabwato orusisirwe omwegyemure.

Ebisharara ebindi ebigaruziibweho harimu hiika 700 z’ebisharara omu gomborora eya Rweikiniro hamwe na hiika 800 z’ekisharara omu gomborora eya Kayonza.

Nashoborora ngu n’obu bashomiise abatuura kuruga omu bisharara bekundiire baheza kusharura ebihingwa byabo, abantu abamwe bakanga bahika nahakubyaramu entookye, omwani, emiti n’ebindi.

RDC wa Ntungamo, Geoffery Mucunguzi.

Beitu, ab’obushoborozi omu disiturikiti ya Ntungamo babitahiremu bacwekyereza ebibaire bihingirwemu Kwenda ngu abantu batagaruka kubitaahirira.

#WestUpdates