Kizza Besigye na  Winnie Byanyima, Noohiri baagikwatira Mbarara

Kizza Besigye na  Winnie Byanyima, Noohiri baagikwatira Mbarara
N’ebya Abdulkarim Ssengendo
Abaikiriza omubureeberezi bwa Mbarara baahigwa kukora ahabintu ebirikuza kureetaho empinduka nungi omu ihanga.

Omwete ogu gwaheebwayo Rtd Col Dr Kizza Besigye owaabeireho Purezidenti w’ekibiina ky’orubaju oruhakani ekya Forum for Democratic Change.

Besigye n’omukazi we, Winnie Byanyima – ori mukuru w’ekitongore ky’amahanga ageeteeraine ekirikugyenderera kurwanisa siriimu (United Nations Programme on HIV/AIDS) baashaba ah’izooba rya Noohiri aha Nyamitanga Cathedral omururembo Mbarara. 

Col Dr. Kizza Besigye na Winnie Byanyima barikuhimbisa erizooba 25.12.2023 ahaklezia ya Nyamitanga Cathedral omururembo Mbarara

Arikugambaho n’abanyamakuru, Besigye yaagira ngu n’obujunaanizibwa bw’abanya Uganda boona kukora n’ekigyendererwa ky’okureetaho empinduka enungi omu Uganda kugira ngu abanya Uganda boona bashemererwe omukujaguza. Yaagira ngu hariho abantu baingi abataajaguza ahabw’okuba baaburwa eky’okukoresa omukujaguza. 
Besigye kandi owaabeireho omukungu omumahe ga Uganda aga Uganda People’s Defence Forces n’omwe ahakikoosi ekya Katonga ekyayehagwire ahakitebe kikuru ekya FDC omuri Najjanankumbi.

Kandi we Winnie Byanyima, omubutumwa bwe yaayendeza abanya Uganda boona obusingye kwonka yaahiga eihanga kugaruka ahabutegyeki bw’abantu n’okurwanisa emiringo yoona ey’okuribatiriramu obugabe bw’abantu oteiremu n’abantu kubuzibwaho. 
Misa ahaklezia ya Nyamitanga yaayebemberwa Ishe-Abareeberezi w’eitware erya Mbarara Lambert Bainomugisha. Okushaba kwayebemberwa abaikiriza kuruga omubicweka bitari bimwe na bimwe eby’eitware.
Tataitwe omuri Kristo yaaburira engiri ya Rukundo kandi yaashaba abaikiriza boona kwega ebirungi omukuzaarwa kwa Yesu Kristo kandi babe abaikiriza barungi batarikugyendera ahamyaka ninga endengo zaabo omumagara

#WestUpdates