Okumaraho za butandu ahanguuto, abavugi ba bodaboda batendekwa

Okumaraho za butandu ahanguuto, abavugi ba bodaboda batendekwa

N’ebya Thomas Tumwebaze

KAKUMIRO:

Abavugi ba boda boda omu disiturikiti ya Kakumiro batendekwa obubonero bw’ahanguuto nk’omuringo gw’okukyendeza ahari butandu z’ahanguuto.

Omushomo ogu gwaba guri omu kyaro kya Itomero, omugomborora eya Nyamarwa omu disiturikiti ya Kakumiro.

Minisita w’eihanga ow’eby’entambura Fred Byamukama kandi ari omuny’eishengero wa Bugangaizi West akwatanise n’ekitongore ekya Wendi Driving School batandikireho ehururu y’okushomesa abavugi ba boda boda ahabubonero bw’ahanguuto okwenda kukyendeeza ahari za butandu ezirikugumizamu kumaraho amagara g’abantu.

Abel Kanyankole orikukurira ebitongore ebirikutendeka abavugi b'ebyiruka omu Uganda...(Photo by Thomas Tumwebaze)

Ehururu erikuza kuba neshomesa abavugi b’ebyiruka boona omukyanga eki eyebembirwe na Abel Kanyankole orikukurira ebitongore byoona ebiri kutendeka abavugi b’ebyiruka omu eihanga.

Abel Kanyankole asiimire Minister Fred Byamukama ahabw’okutamu amaani okureeba ngu abarikutendeka abavugi b’ebyiruka bagaruka omu bantu okwongyera okubashomesa nikwo za butandu zibaase kukyendeera.

Abel nagumizamu agiira ngu nikirungi abantu boona abarikuvuga okuguma barikwejumbira omumishomo erikuba nekwata aha byiruka obwo arikugira ngu buriizooba nihaba hariho ekisya aha ruguuto kandi ekirikuba kishemereire okumanywa.

Bo abeebembezi baaba Boda-Boda omu disiturikiti ya Kakumiro hamwe na Kagadi basiimire omushomo kandi bagira ngu eki nikiza kubahweraho okukozesagye enguuto.

Aba bashabire gavumenti okukyendeeza aha sente za ‘driving permit’ bagumize ngu sente ezibarikushashura nizingana n’ez’ab’emotoka.

Abdul Ssesazi, omuhwezi wa mukuru w’entebe y’okubanza owa Itomero asiimire omushomo ogu arikugira ngu nibyingi ebi bayegamu kandi ebiri kuza kubahwera obutahenda biragiro kandi otireho n’okurinda amagara gaabo.

Rebecca Natumanya, ori manager wa Wendi Driving School omu kyanga kya Bunyoro naagira ngu abavugi ba Boda-Boda abeingi tibarikukuratira ebiragiro by’ahanguuto ngu kandi obumwe ebibarikushoma tibirikuteebwa munkora.

Okurugiirira ahari riipota ya pooriisi ey’omwaka 2023, butandu z’ahanguuto nizo zikirizeyo okwita n’okuremaza abantu omu Uganda kandi zabutandu ezi zikeyongyera n’obucweka 16.9 ahari 100 omu mwaka 2022.

Riipota neyongyera eyoreka ngu abantu 71 nibo bafeereire omuri zabutandu 381 omu sabiiti 2 zonka omu kwezi kwikumi omwaka 2023.

#WestUpdates