Okutandikaho ekigombe ekindi kuruga aha FDC kwanjwirwe.

N’ebya Isaac Nuwagaba

NAJJANKUMBI

Ebiganiiro by’okutandiikaho ekigombe ekisya kuruga ahakya FDC zanjwirwe ekiretsireho ebibuuzo bingi ahari nyensya y’ekigombe n’abamemba ba FDC.

Ebiganiiro ebi bitandikirweho abantu b’amaani omu kigombe ekya FDC beebembiirwe owabaireho Purezidenti wa FDC, Dr. Col. (Rtd) Kiiza Besigye obagizire obuteikirizana n’abeebembezi b’ekigombe hamwe n’ahi ekigombe kiriyo nikiza bwanyima y’okujunaana Purezidenti w’ekigombe Patrick Amuriat Oboi n’omuhandiiki wa FDC, Nathan Nandala Mafabi kuba baatungire shiringi biriyooni 7 kuruga omu gavumenti omu karuuru ka boona aka 2021.

Owabaireho Purezidenti wa FDC, Col. Dr. Kiiza Besigye arikubuganaho abashagiki b'ekigombe omu rukiiko orubagizire ahari Kireka Rehabilitation Centre omu disiturikiti ya Wakiso.

Guruupu erimu obaire ari ceeyamaani w’ekigombe, Wasswa Birigwa, owabaireho Omuny’ishengyero wa Rukungiri Munisiparite Roland Kaginda n’abandi bantu b’amaani omu kigombe eki ababaire bataariho, batwire nibagiiraho enkiiko omu kihama ebiro ebihingwire barikuganiira aha kutandikaho ekigombe ekisya.

Abashagiki b'ekigombe kya FDC abashagikire eky'okutandikaho ekigombe ekisya kuruga aha FDC eya Najjanankumbi.

Omu rukiiko orubagizire ahari Kireka Rehabilitation Centre omu disiturikiti ya Wakiso orubaire rukuriirwe Omunyishengyero wa Kira Munisiparite, Ibrahim Ssemujju Nganda, enshonga ezibaganiireho ni nyingi beitu ababaire bari omu rukiiko oru abamwe nibagira ngu enshonga ey’amaani ebaire eri okukora kubi kw’ekigombe omu buruuru obuheererukire kuteerwa.

Enshonga ebaire eri okurwana okuri omu kigombe n’okwebaganisamu ebi byoona ebirikugambwa kuba biretsirweho abantu abarikwerondera ebyabo nk’abantu. Ebiganiiro nibireebwa nk’ebigyenderiire kureeba ngu baruga omu ntaro ezi batandika eshuura nsya.

N’obu amakuru aga gabaasa kwija nk’ekyekango aha bashagiki baingi b’ekigombe ekya FDC, nikyorekwa ngu ebiganiiro ebi nibwo bitandikire kandi bikiriyo nibigyenda omu maisho.

Abeebembezi b’ekigombe ekya FDC baizire nibajumirirwa ahabw’okukora kubi omu buruuru obuheererukire kuteerwa kandi ba memba abaingi nibareeba ngu ekigombe kishemeriire kutandika eshuura nsya.

Owabaireho Purezidenti wa FDC, Col. Dr. Kiiza Besigye arabwire abantu okwerinda esente z’enziro baaba nibenda kureetaho empinduuka omu bwebembezi bw’eihanga oburiho obwa hati.

#WestUpdates