Amuriat yaashoboorora eky’okubinga Ssemujju ahabwa Chief Whip.

N’ebya Umaru Kashaka   

Purezidenti w’ekigombe ekya Forum for Democratic Change (FDC), Patrick Amuriat, yaashoboorora ahabw'enki baacwamu kubinga Omuny’ishengyero wa Kira Munisiparite, Ibrahim Ssemujju Nganda, ahabwa Nyampara bw’ekigombe omu Paramenti.

Ahabiro 07/08/2023, Omuhandiiki mukuru wa FDC, Nandala Mafabi ahandiikiire Sipiika wa Paramenti, Anita Among arikutoorana Omuny’ishengyero wa Mawokota South, Yusuf Nsibambi nka nyampara w’ekigombe omusya kuza omu bigyere bya Ssemujju. Nsibambi yaatandikiraho kukora omurimo ogwamuheebwa.

 “Omu muringo nigwo gumwe, Twayiha Ssemujju Ibrahim Nganda ahabwa Nyampara bw’ekigombe ekya FDC aho n’aho. Enkwatanisa yaawe ei obaire oine nitukushaba ogumizemu nayo,” Nandala arikugamba omu baruha ye eyahamibwa Amuriat.

“Ssemujju arugire aha bujunaanizibwa bwe kandi ekigombe n'omurimo gw'omugambirizi w'ekigombe tagukozire gye, beitu nawe arugireyo yaarangirira ngu takyenda kukorera ahansi y’obwebembezi bwangye,” Amuriat arikugambaho n’abanyamakuru baitu aharwakabiri ebiro 08/08/2023.

Amuriat naajunaana Ssemujju ahabw’okuremwa kuhayo rupoota ehandiikirwe kuruga omu Paramenti kugiheereza ab’akakiiko akakuru ak’ekigombe kya FDC kumara haihi emyaka 5.

Amuriat yaagira ngu baatandika n’ahantwaza ey’okubiinga Ssemujju ahabw’omugambirizi w’ekigombe.

“Ssemujju naija kureebekaho omu maisho g’akakiiko ka FDC ak’emicwe n’emitwarize kushoboorora ahabw’enki arugire aha bujunaanizibwa bwe n’okujwekyera kubi ekigombe nk’omugambirizi, Amuriat arikwongyera kushoboorora.

Twagambaho na Ssemujju kandi yaagira ngu Amuriat na Nandala tabaine bushoboorozi bw’okumubinga ngu ahabw’okuba akatooranwa akakiiko ka NEC aka FDC.

Ssemujju na guruupu y’abeebembezi ba FDC abarimu n’owatandikireho ekigombe kya FDC, Col. Dr. Kizza Besigye baine obutaikirizana na Amuriat na Nandala ahabw’eki barikweta esente z’enziro ezi baatungire kuruga owa Purezidenti Yoweri Museveni ezi ekigombe kyakoreise omu karuuru ka boona aka 2021.

Omu bigambo bye, Yusuf Nsibambi yaagira ngu ayeteekateekire kugaita hamwe embaju zombi kureeba ngu emirimo y’ekigombe yaagumizamu omu maisho.

#WestUpdates