Emigaso gya boneti y'emmotoka gy'obadde tomanyi

BONETI kye kimu ku bitundu ebikola omulimu ogw’amaanyi ku mmotoka naddala okugikuuma nga nnamu n’okutambula obulungi.

Yasin Lusiba makanika okuva mu Agaati Auto Garage e Luzira agamba nti boneti eno erina omugaso gwa maanyi ku mmotoka nga ekisookera ddala y’evunaanyizibwa ku kubikka ebyuma by’emmotoka ebisangibwa ku kitundu ky’omumaaso okuli yingini n’ebirala.

Ebyuma bino ebisinga tebirina kutonnyako mazzi nga n’ebimu tebirina kugendako nfuufu nga bino byonna okubikuuma nga biramu bibikkibwako boneti ate ng’eri mu mbeera nnungi.

Emmotoka yonna ebeera esobola okutambula nga teriiko boneti naye singa osanga enkuba oba enfuufu emmotoka ebeera ekosebwa . Okugeza waliwo ebyuma nga yingini ebitalina tutonnyamu mazzi.

Bw’oteekako faani ya yingini nga ovuga emmotoka, boneti ekolo kinene okukuuma empewo obutafuumuuka okusobola okukkakkanya yingini kyokka singa boneti tebaako empewo ebeera efuumuuka bufumuusi nga tegimala, ekiyinza okukosa emmotoka.

ENSIBA YA BONETI ENTUUFU
Boneti erina ebikondo ebikozesebwa okugisibira waggulu n’enywera bulungi nga bino bibeeramu emisumaali egigiroba n’ebeera nga eyimiridde bulungi nga emmotoka y’ekebejjebwa.

Bwe tutuuka okugiggala, waliwo akatundu akabeerako eddobo erigiroba nga ne bw’oba tonnagiggalira ddala ebeera teyinza kumala geggula.

Waliwo n’eddobo eddala eddene nga lino okugiggala olina kukkatiramu olwo kkufulu n’eryoka egikwata bulungi n’enywera.