Pulezidenti Museveni awagidde project ze Bukalango

Omumyuka wa Pulezidenti, Jessica Alupo atenderezza omugenzi Msgr. Expedito Magembe olw’okwolesebwa kweyafuna n’atandikawo ekifo ky’essaala, ekya Mount Sion Prayer Centre Bukalango.

Amyika Pulezidenti Jesca Alupo ng'ali mu kifaananyi eky'awamu ne ssaabasumba

Y’ategeezezza nti ekifo kino kyafuuka ekkungaanyizo ly’abasabi n’abeegayirizi, abajja okusisinkana Katonda waabwe, nebavaawo ngabafunye okusonyiyibwa, okukubagizibwa, okubuulirirwa, n’okuwonyezebwa okw’omwoyo n’omubiri.

Y’atenderezza Msgr. Magembe olw’ebitone bye ebingi, okuli obwetowaze, obumalirivu, obugumiikiriza n’okukkiriza, byeyagambye nti byeebyamuyamba okubangawo n’okukulaakulanya ekifo kino.

Ezimu ku projects ezikoleddwa Pulezidenti Museveni e Bukalango

Y’abadde  kumukolo ogw’okujaguza emyaka 25 egya Mount Sion Prayer Center Bukalango, ogw’abadde mukifo kino ekisangibwa ku Luguudo lw’e Hoima, mu Town Council y’e Kakiri, mu disitulikiti y’e Wakiso, ku Ssande nga April,19.

Alupo y’asiimye Abasaserdooti n’Ababiikira, n’Abakristu abaweerereza mukifo kino, olwomulimo omulungi gwebakola, n’abasaba okusigala nga baweereza Katonda n’amaanyi, n’okukkiriza.

Omukolo gw’atandise ne mmisa eyakulembeddwa Ssabasumba w’essaza ekkulu ery’e Kampala, Paul Ssemogerere, ngali neba Viika Genero okw’abaddee Msgr. Gerald Kalumba, Msgr. Rogers Kabuye Mukasa, amyuka Dayirekiata wa Mount Sion Fr. James Ssebayigga, n’Abasaserdooti abalala bangi.

Abaana nga basanyusa abagenyi e Bukalango

Ssabaumba naye yeebazizza Omugenzi Msgr. Magembe olw’okutandikawo ekifo kino kyeyagambye nti kiyambye nnyo okuzza abantu eri Katonda, okubabudaabuda, okubawabula, okubatikkula emigugu, okubazzaamu essuubi, okubongera amaanyi mukukkiriza,  nokubanyiga ebiwundu eby’omwoyo n’eby’omubiri.Y’ategeezezza nti Msgr. Magembe y’akozesa bulungi ebitone bye, n’atayawulamu Klezia wabula okwongera okugigatta. Yasimye ne Kalidinaali Wamala, ne Ssabasumba Paulo Ssemogerere,  olwokumuwa obuwagizi,

Okuyimba mmisa e Bukalango

Y’asimye Pulezidenti Museveni olw’okwagala ennyo Msgr. Magembe ne Mount Zion Prayer Centre Bukalango,n’atuuka n’okugyizimbira ennyumba y’Abasista, ekizimbe ky’edduuka ly’ebitabo mwebanajjanga ejjamba, Telefayina ya Bukalango, ate ne Klezia gaggadde eri mukuzimbibwa.

Amyuka dayirekita w’ekifo kino, Fr. James Ssabayigga y’ebazizza Pulezidenti olw’ebirungi byonna by’akoledde ekifo kino, kyokka n’ategeeza nti Television gyeyabawa (Bukalango TV) y’aggyibwa ku mpewo olw’emisolo, n’asaba omumyuka wa Pulezidenti ensonga eno agyitwale ew.omukulu, television ezzibwe kumayengo, omulimo gw’Evanjiri gugende mu maaso.

Mukusooka, omumyuka wa Pulezidenti y’agguddewo ennyumba y’Abasista, nekizimbe kyabwe ek’ettundiro ly’ebitabo (Bookshop), eky’azimbiddwa ba Bayinginiya ba UPDF, era nga Pulezidenti yeyataddemu ensimbi. Alupo ne Ssabasumba Ssemogerere era baatongozza omulimo gw’okuzimba ennyumba y’Abasaserdooti, nebalambula ne Klezia, nayo nga Pulezidenti y’agyivujjirira.

Abasisita e Bukalango

Alupo y’atuusizza n’obubaka bwa Pulezidenti obuyozaayoza Bannasioni, era n’ayanjula n’ensimbi za Uganda obukadde 50 zeyatonedde ekifo kino.

Omukolo gwetabiddwako ne Ssabaminista Robinah Nabbanja, Minista akola kuby’enjigiriza ebya waggulu Dr. John Chrysostom Muyingo, minista wa Buganda obw’obuwangwa n’ennono, Dr Anthony Wamala, Omubaka wa Pulezidenti mu Wakiso, Justine Mbabazi,  ne Mayor wa Kakiri omulonde, Moses Bagala.

Waabaddewo n’okusonda ssente ez’okuzimba ennyumba y’Abaaserdooti, nga Saabaminista Nabbanja omulimo guno y’agutaddeko obukadde 5 mu kkaasi. Vice-Pulezident Alupo n’asubbizza obukadde kkumi, ate Dr. Muyingo n’awaayo ensawo za sseminti 100.

Omumyuka wa Pulezidenti ne minista Muyingo nga batwala ebirabo

Ssabaminista Nabbanja y’awaddeyo obukadde 35 mu kkaasi, Vice-President Alupo y’asuubizza obukadde 10, ate Dr. Muyingo n’awaayo ensawo za sseminti 100.

Emikolo gy’atambulidde kumulamwa ogugamba nti: Okwagala Kristu N’okumwagazisa Abalala.