Man City ewadde John Stones endagaano ya myaka etaano

Omuzannyi ono y’omu ku basinze okuyimirirako ekisenge kya Man City era omutendesi Pep Guardiola y’omu ku b’asibiddeko olukoba wadde nga gye buvuddeko yali amulaba ng’atakyasobola kubaako ky’ayamba ttiimu ye.

Okumanya Stones alinnyisizza omutindo, ne ku ttiimu y’eggwanga etendekebwa Gareth Southgate yaddamu n’amuyita ekiraga nti ddala mu kiseera kino muzannyi wa mugaso.

Pep Guardiola ng'aliko by'agamba stones

Wabaddewo ebigambibwa nti Stones yandyegatta ku ttiimu endala gye buggya era kino kyawalirizza bakama be okwanguwa okumuwa endagaano basobole okumukuuma.

Arsenal y’emu ku ttiimu ezaali zimwagala mu katale k’abazannyi aka June omwaka oguwedde. Stones, 26, endagaano ye eno w’eneggweerako, asuubirwa okuba ng’afunye obukadde bwa pawundi 39.

Stones ng'acanga akapiira

Kino kijjidde mu kaseera nga n’omuwuwuttanyi Kevin de Bruyne yaakamala okuweebwa endagaano empya mw’anaafunira emitwalo gya pawundi 30 buli wiiki. Endagaano ya Stones ebadde eggwaako mu 2022 era mu kiseera we bazannyidde ne Ruben Dias, bamazeeko emipiira 16 nga Man City teteebeddwaamu.