Pochettino awaanye Guardiola nti ye mutendesi asinga
Apr 27, 2021
OMUTENDESI wa PSG, Mauricio Pochettino atenderezza munne Pep Guardiola owa Man City ng’omu ku batendesi abakyasinze okumanya okutendeka omupiira mu nsi yonna.
By Bukedde Omusunsuzi
Journalist @NewVision
Bino Guardiola abyogedde ttiimu zombi zibulako olunaku lumu zittunke mu gw’oluzannya olusooka ku semi za Champions League. Man City y’erumbye PSG e Bufalansa mu gw’oluzannya olusooka kyokka kino abatunuulizi bagulabye nga olutalo nnamba nnya wakati w’abatendesi bombi.
Bano baasooka okwolekaganya obwanga nga bakyali bazannyi, Guardiola bwe yali azannyira Barcelona sso nga Pochettino azannyira muggya wa Barcelona, Espanyol mu liigi y’e Spain.
Pochettino (ku kkono) ne Guardiola nga baliko bye boogera.
Oluvannyuma, bombi baasisinkana ng’abatendesi nga Guardiola atendeka Barcelona ate Pochettino ng’atendeka Espanyol. Wano wonna nga Guardiola yeefuga ensisinkano zaabwe.Emirundi emirala gye basisinkanye, babadde battunka mu liigi ya Bungereza nga Guardiola ali mu Man City ate nga Pochettino ali mu Spurs. Wabula olusisinkano olukyasinze okuba olwa vvaawompitewo lwali lwa Champions League ttiimu zombi bwe zaasisinkana ku quarter mu 2018.
Wano Pochettino ye yali omuzira bwe yaggyamu Guardiola era gye byaggwera nga Spurs yeesozze oluzannya oluddako era yasibira ku fayinolo.
Nga bazzeemu okusisinkana enkya abawagizi b’omupiira beesunze ensisinkano eno era waliwo okukubagana empawa ku ani anaamegga munne era aneesogga oluzannya lwa fayinolo.
No Comment