Mourinho eyeeyitako ‘The Special One’ asiba bikutuka

Spurs gy’atendeka eri mu kyamwenda mu Premier ekireeseewo oluvuuvuumo nti yandikwatibwa ku nkoona ku nkomerero ya sizoni singa temalira mu bifo ebigitwala mu Champions League oba ekitono ennyo Europa. Spurs erina obubonero 36 mu mipiira 23 nga Chelsea ne West Ham ezisibaganye mu kyokuna zirina 42, Liverpool 40, Everton 37 ne Aston Villa 36.

Kigambibwa nti ssentebe wa Spurs, Daniel Levy yatandise dda okuperereza Brendan Rodgers (Leicester City) ne Julian Nagelsmann (RB Leipzig) okusikira Mourinho eyaliivula Mauricio Pochettino mu December wa 2019. Ekitiisa Levy, gwe mudidi gw’ayinza okuliyirira Mourinho singa amufuumuula ng’endagaano ye tennaggwaako mu 2023.

Abamu ku bawagizi ba Spurs tebaagala Mourinho nti omupiira gwe gwa ‘bbaasi’ tegugya mu nnono ya ttiimu yaabwe. Wabula waliwo abamuwolereza nti ttiimu yagisanga eri ku ndeboolebo ya kusalwako n’agizza engulu ate kati alina n’omukisa ogugiwangulirayo ekikopo.

Mu April, Spurs ettunka ne Man City ku fayinolo ya Carabao Cup sso ng’era ekyali mu Europa. Ku Lwokuna, Spurs bubeefuka ne Wolfsburg eya Girimaani ate ku Ssande ekyalire West Ham mu Premier.