Lutaaya ne Namatovu balaze sitayiro nga bajaguza emyaka 10 mu bufumbo obutukuvu

IRENE Namatovu ne bba, Geoffrey Lutaaya omubaka wa Kakuuto mu Palamenti, bakuzizza emyaka 10 egy’obufumbo obutukuvu mu sitayiro.

Namatovu ne Lutaaya abaagattibwa nga January 25, 2014 mu kkanisa y’e Kijjabwemi C/U e Masaka, baasembeza abagenyi mu maka ga taata wa Lutaaya, Mzee Nelson Kaboggoza (yafa) e Mityebiri mu Kakuuto mu Kyotera. 

Namatovu Ng'ali N'emperekeze Ze.

Namatovu Mukatolikiti ate Lutaaya, Mukristaayo kyokka bakkaanya babagatte bwe batyo Namatovu n’asigala mu Bukatoliki era asinga kusabira Bukalango ewa Msgr. Magembe. Balina abaana bana be bafunye mu myaka egigenda mu 25 bukya basisinkana.

Olwaleero, giweze emyaka 10 n’ennaku nnya bukya bakuba biragaano by’obufumbo Obutukuvu.

Mu kukuza emyaka egyo, abagole beekubisizza ebifaananyi okwabadde Bobi Wine (Robert Kyagulanyi) Pulezidenti wa NUP. 

Lutaaya Ne Namatovu Bwe Baalabise Ku Bijaguzo.

Ebifaananyi byalaze abaabadde ng’emperekeze ezaawerekedde Lutaaya, kwabaddeko abayimbi ba B2C ne mikwano gyabwe babiri ate Namatovu kwabaddeko Chosen Becky, Betina Namukasa, Eva Namulondo wa Ebonies ne Maama Nakanjakko owa tiktok. Leero ku Mmande, bategeseeyo ekipya ekirala.