Omuyizi agambibwa okuba amabega w'okuwamba abantu 170 n'abakuumira mu nju ng'abasuubiza emirimu e Kenya akwatiddwa

Bya Godfrey Kigobero 

OMUYIZI w'essomero agambibwa okubeera amabega w'okuwamba abantu 170 n'abakuumira mu nnyumba emu e Kakiri Wakiso ng'abasuubiza emirimu e Kenya, akwatiddwa poliisi.

Okukwatibwa kw'omuyizi, William Kigyenyi 17 owa S3 mu Kapeeka Senior Secondary School,  kiridde poliisi e Kakiri okukwata omukyala Harriet Nassuuna 28  agambibwa okuba nti baamusanga n'abavubuka 170 mu nnyumba emu e Nampunge e Kakiri mu Wakiso omwezi oguwedde.

Kigambibwa nti Nassuuna yalaajanira poliisi, nga Mugyenyi bwe yali mu lukwe, lw'okumutuma abavubuka bano, abatwale e Kenya  mu kkampuni ya Hambo abafunire emirimu egy'enjawulo omuli okukola mu super market , okupakira kaawa, okuweereza mu bbaala  n'ebirala.

Abavubuka bano bonna , baatwalibwa ku poliisi e Kakiri gye baabagirako sitatimenti nti n'oluvannyuma ne babalagira okudda ewaabwe ng'okunoonyereza kugenda mu maaso.

Omwogezi wa poliisi mu ggwanga Fred Enanga, agambye nti Mugyenyi, bamugguddeko emisango 170 , ng'okubuuliriza kukolebwa.

Enanga agambye era nga poliisi y'e Kawempe bw'ekutte Brenda Nantale 21 ne Lawrence Sewamala 27  abe Erisa e Kyebando, nga kigambibwa nti babadde baakukusa abaana abawala 10, be babadde bakozesa okukwata obutambi obw'ebuseegu ne babusaasaanya era nga ne mukama waabwe Arinaitwe eyadduse naye bamuyigga.