Titurikwenda kwejwanzya omu by’obutegyeki- Omusinga Mumbere.

N’ebya Samuel Amanyire na John Thawite

KASESE

Omusinga wa Rwenzururu Charles Wesley Mumbere ajumiriire okurwana okwabaireho omu mwaka gwa 2016 ahagati y’ababaire bari abakumi obwire obwo hamwe n’ab’eby’okwerinda okwafeeriiremu abantu 103 ahi 87 ahari aba babaire bari abakumi b’obusinga kandi 16 bakaba bari aba Pooriisi.

Mumbere agambire ebi aharwamukaaga obu Obusinga bwa Rwenzururu bubaire buteebekaniise omukoro gw’okusiima ogubaire aha kanisa eya St. Paul’s Cathedral omuri Kamaiba omu Munisiparite eya Kasese.

Biishopu Nason Baluku arikushabira aba famire y'omusinga omu kushaba okubaire aha kanisa eya St. Paul's omuri Kamaiba, Kasese Munisiparite aharwamukaaga ebiro 07/10/2023.l.

Omusinga wa Rwenzururu agizire ngu embaju zombie ezabaire nizirwana tihaine muntu weena owabaire aine kufa arikwongyeraho n’okwita kikaba kitarikwetengyesa.

Mumbere ayongiire yaagira ngu ekyaretsireho okurwana oku n’akavuyo akarugiremu okurwana omu mwaka gwa 2016 okwafeeriiremu abantu baingi ahabw’abantu bakye ababaire niberondera ebyabo nk’abantu hamwe n’abangizi b’obusinga ababaire nibaheereza gavumenti amakuru gagwire.

Omusinga Charles Wesley Mumbere (bumosho), omukazi Agnes Ithungu ( ahagati) , Biishopu Nason Baluku, abaana b'omusinga n'abandi baikiriza aha muryango gw'okutaaha omukanisa ya St. Paul's Cathedral bwanyima y'omukoro gw'okusiima.

Omusinga araganiise ngu tarikwija kwikiriza omuntu weena kumuta omu by’obutegyeki nk’oku obusinga buriyo nibutandika enshura nsya nikwo kurabura abanyabutegyeki okwetantara enshonga zoona eziine akakwate n’obusinga bwa Rwenzururu. 

Asiimire amaka agafeerirwe abantu baabo ahabw’okugumisiririza embeera n’okuraba omu busaasi bw’okufeerwa abakundwa baabo.

#WestUpdates