Ogw’amabaati; Okuhurira ogwa Nandutu nikugarukamu aharwokubanza

Ogw’amabaati; Okuhurira ogwa Nandutu nikugarukamu aharwokubanza

N’ebya Michael Odeng

Okuhurira omushango ahi Minisita w’eihanga ow’enshonga za Karamoja, Agnes Nandutu, arikujunaanwa okukoresa kubi amabaati g’abantu ba Karamoja nikugarukamu aharwokubanza 6/11/2023 omu kooti erikurwanisa obushomankuzi omuri Kampala.

Okuhurira omushango ogu nikwija kuba kukurirwe omuramuzi Jane Okuo Kajuga.

Nandutu, ori omuny’eishengyerokazi ahabwa disiturikiti ya Bududa najwekyerwa ba puriida Evans Ochieng, John Nalela na Charles Nandaah Wamukoota kandi orubaju oruhababi nirujwekyerwa David Bisamunyu.

Omu kushutama kwa kooti okuhererukire, Geoffrey Seremba kuruga omu Ofiisi y’enganzi y’eihanga akamanyisa kooti ngu amabaati 1000 ahari 10,000 agashohoire kuruga omu sitooha omuri Namanve gakatwarwa omu disiturikiti ya Moroto.

Kurugirira ahari Seremba, amabaati 1000 aga agabaire gatasigiire rangi gakatwarwa Moroto kandi amabaati agandi gakaheebwa abantu abanda ahandagiriro kuruga omu Minisita w’enshonga za Karamoja, Goretti Kitutu.

Nandutu najunaanwa omushango gw’okugira akakwate n’ebintu by’enyibano kandi yasingizibwa omushango ogu, naija kumara emyaka 7 omukihome.

Orubaju oruhababi nirugira ngu ahagati y’Okwamukaga n’Okwamushanju 2022, Nandutu akaakiira amabaati 2000 omu sitooha za Ofiisi y’enganzi y’eihanga omuri Namanve omu disiturikiti ya Mukono.

Aharubaju orundi, Minisita Goretti Kitutu najunaanwa emishango ebiri y’okukoresa kubi ebintu bya gavumenti n’okuza omu rukwe rw’okucupura omu kooti erikurwanisa obushomankuzi.

#WestUpdates