Minisita Hanifa Kawooya alabudde abeegemesa Covid- 19 ne batakuuma mateeka agabutangira okusaasaana

Bya James Magala

Minisita omubeezi avunaanyizibwa ku guno naguli mu minisitule y'eby'obulamu, Hanifa Kawooya alidde mu ttama n'alabula Bannayuganda abaamala okwegemesa ekirwadde kya Covid-19 kyokka ne batafaayo kukuuma mateeka agassibwawo minisitule okutangira okusaasaana kwa Covid-19.

Okuva mu mbeera minisita Hanifah Kawooya abadde agenze Luzira okutongoza okugema Covid-19 okuwomeddwaamu omutwe Gavumenti ya Ireland mu kaweefube w'okukwasizaako Gavumenti ya Uganda okulwanyisa okusaasaana kwa Covid-19 atadde ensi yonna ku bunkenke.

Minisita Hanifah Kawooya atabukidde abantu ababadde bambadde obubi masiki n'ategeeza nti omuntu okwegemesa tekitegeeza butafaayo kwekuuma n'alabula abantu okuva mu kusaaga beekume ekirwadde kya Covid-19 era nga wano asiimye Gavumenti ya Ireland  olw'eddagala lya Astrazenac lye baaweereza Uganda.

Omukolo guno gwetabiddwaako Minisita wa Ireland  avunaanyizibwa ku nsonga z'amawanga amalala Colm Brophy nga wano Omubaka wa Pulezidenti e Nakawa Mac Baingana y'asookedde ddala okwegemesa n'akunga abantu bonna okwettanira okwegemesa.

Ye Omubaka wa Nakawa East Ying. Ronald Balimwezo asinziddde ku mukolo guno n'aloopera Minisitule y'ebyobulamu abantu abatandise okucupula kaadi eziweebwa abantu abagemeddwa Covid-19 n'ategeeza nti kino kya bulabe nnyo eri eggwanga n'abantu ssekinoomu.