Abagambibwa okukuba owa Spice Supermarket essasi basimbiddwa mu kkooti

Bya Eric Yiga

ABAVUBUKA abaakwatibwa ku byekuusa ku kutigomya Bannamukono mu buzigu  ssaako n'okubanyagulula nga beeyambisa emmundu ssaako n'ebissi ebirala  leero basimbiddwa mu kkooti ne basomebwa emisango omuli ogy'obubbisa emmundu ssaako n'okugezaako okutta omuntu.

Bano kuliko; Ramathan Kirumira 28 nga manyiddwa nga Taata Budi  mutuuze ku kyalo Kitete , John Kalyango 23 mutuuze w’e Kitete , Asuman Kanagodawa mutuuze w’e Kikooza , Ismal Ssenkubulwa mutuuze wa Ham Mukasa, Juma Katende 27 mugoba wa bodaboda mutuuze we Kiyunga, Mustafa Zziwa 52 mutuuze w’e Bulega , Reagan Ndugga 23 nga mutuuze wa Kkubbiri, Ezra Kizito mugoba wa Boda boda nga mutuuze wa Ham Mukasa , Abdul Galabuzi  23 mutuuze w’e Kasangalabi ne John Robert Oluka 23  mutuuze w’e Busembatya.

Bano balabiseeko mu maaso ng'omulamuzi w’eddaala erisooka mu kkooti y’e Mukono, Tadeo Muida.

Ku bano Juma Katende kigambibwa y'omu ku baalumba Super markert ya Spice esangimbwa mu kibuga Mukono n’ebalumya Annet Ssekandi eyali akwata ssente ne bamukuba essasi ku mugogo ne liyitamu ne likwata n'ekisenge ne banyaga n'ensimbi obukadde 6,047400.

Ono agguddwaako emisango ebiri omuli ogw'okubbisa e mmundu ssaako n'okugezaako okutta omuntu.

Bano emisango baagiza   June omwaka guno  mu bitundu ebyenjawulo.

Kigambibwa nti bano nga beeyambisa emmundu ssaako n'ebissi ebirala omuli obwambe, ejjambiya n'ebirala baalumba abantu abenjawulo ku byalo okuli Namubiru, Spice Supermarkert, Kitete, Kasagalabi, Kkubiri , Ttakkanjuge n'ebitundu ebirala ne banyagulula ebintu ebyenjawulo  omwali ttivvi, amasimu, ensimbi enkalu, emmotoka, kompyuta, pikipiki nnamba UAQ 573X  saako n'okulumya bantu ab’enjawulo omwali; Richard Seruwangi, Immaculate Nanyombi  Gitta, Gitta Joshua , Kabonzi Richard ,  Paul Tukashaba n'abarala.

Bano omulamuzi abagaanyi okubaako ne kye boogera kuba omusango gwebaza gwa nnagomola ogutasobola kuwulirizibwa kkooti eno bw’atyo n’abasindika ku limanda mu kkomera e Luzira okutuusa nga August 2,2022 lwe bagenda okudda basomerwe emisango gino.

Wabula abamu ku benganda zaabavunaanibwa batabukidde bannamawulire nti babawandiikako, ate abalala ne bategeeza ng'abantu baabwe bwe babalanga obwemage.

Wiiki ewedde abamu ku bano okuli; Ramathan Kirumira ne John Kalyango baakulemberamu poliisi okugitwala mu bifo webaali bakoze obunyazi sasako n'okulumya abantu mu bifo eby’enjawulo e Mukono.