Asabye abasajja okusiimanga abakazi be batobye nabo okuva mu bwavu

Tusiime omusuubuzi ow’amaanyi mu Buddo ate omukozi ow’ebyokunywa mu kkampuni emu yacamudde abatuuze mu kitundu olw’oluseregende lw’emmotoka ezibadde zisoba mu 50 ezimuwerekeddeko okwanjulwa e Mulago mu Kampala.

Tusiime ne mukyala we eyamwanjudde.

Tusiime ategeezezza nti mukyala we amaze naye emyaka egisoba mu 13 nti era mu myaka egyo amuyigiddeko ebintu ebirungi bingi nnyo era ng’ekirabo kyokka ky’abadde alina okumuwa okumusanyusa kwe kugenda mu bakadde be.

Mmeeya Walukagga naye yasanyusizza abantu.

Tusiime asabye abasajja okusiimanga bakyala baabwe naddala be batobye nabo okuva mu mbeera embi kubanga  baba balaze obugumiikiriza nti nga ye kye kimuwalirizza okwanjula mukyala we olw’ebirungi by’amuwadde.

Omukolo guno gwetabiddwako abayimbi ab’enjawulo abaasanyusizza abantu era ku bano mubaddemu, mmeeya wa Kyengera, Mathias Walukagga, David Lutalo ne Betina Namukasa.