Otafiire alagidde abaserikale abatayagala kugenda kutendekebwa bagobwe mu poliisi

MINISITA w'ensonga z'omunda mu ggwanga Maj. Gen. Kahinda Otafiire alagidde omuduumuzi wa poliisi mu ggwanga okugoba abaserikale bonna abatayagala kugenda kutendekebwa nga basabiddwa.

Bwe yabadde ku mukolo gw'okufulumya abaserikale 41 abaabadde mu kutendekebwa mu ttendekero lya Poliisi erya Senior Command and Staff College e Bwebajja ku Lwokuna, minisita Otafire yagambye nti abaserikale abatalina nsonga ya ssimba nga basunsuddwamu okugenda okutendekebwa bagobwe mu poliisi.

Maj Gen. Katsigazi Ku Ddyo Ng'aliko By’abuulira Minisita Kahinda Otafire Bwe Baabadde E Bwebajja.

"Waliwo abaserikale abasunsulwamu ne basindikibwa okutendekebwa wabula ne beekwasa ensonga ezitaliimu ggumba okuggyako nga omuntu aleese obukakafu nga mulwadde muyi naye bwe kitaba ekyo agaana okugenda agobwe mu poliisi," Minisita Otafire bwe yategeezezza.

Yagambye omuserikale okusindikibwa mu kutendekebwa kimuyamba okuwongera okumanya entambuza y'emirimu n'okumwawula ku balala naddala abantu ba bulijjo n'obutakola nsobi .

Enanga Ng'ayozaayoza Phillip Mukasa Omu Ku Baserikale Abaabadde Mu Kutendekebwa E Bwebajja

Yategeezezza nti okuddamu okubangula abaserikale kibayamba okufuna amagezi n'obukugu kuba embeera ezze ekyuka nga emabega baali balwanyisa ababbi b'enkoko nga kati obumenyi bw'amateeka buzze bukyuka nga kati waliwo abeeyambisa ebyuma bikalimagezi okuzza emisango.

Minisita Otafire Ng'akwasa Herman Owomugisha Satifikeeti.

Yalabudde abaserikale okukomya okulya enguzi n’agamba nti omuserikale yenna eyayingira poliisi nga anoonya ssente agiveemu agende mu busuubuzi kuba omuserikale yenna alina kufuna musaala ekirango omwoyo gw'eggwanga.

Amyuka omuduumuzi wa poliisi mu ggwanga Maj. Gen Katsigazi Tumusiime yagambye nti abaserikale abatendekeddwa balina okusa mu nkola ebyo bye bayize mu kutendekebwa okumala omwaka ogumu.

Yagambye nti okubangula abaserikale lye ssuubi y'okumalawo enguzi mu baserikale kuba buli mwaka oguggwaako alipoota ezifulumizibwa ziteeka poliisi ku mwanjo mu buli bw'enguzi.

Abamu ku baserikale abafulumiziddwa kuliko Herman Owomugisha eyakulirako Flying Squad,

Emilian Kayima , Phillip Mukasa, Bernad Mugerwa, Frantaile Lwamusaayi, Hashim Kasiga, Kituumwa Rusoke  nga Muhammad Sowedi yeyasinze banne mwebabadde mu kutendekebwa