Abaazirwanako n'abaana baabwe baakuyambibwa okufuna obulamu obweyagaza

MINISITULE evunaanyizibwa ku byokwerinda mu ggwanga ekakasizza nga bw'egenda okuteeka amaanyi ku baazirwanako wamu n’abaana baabwe nabo babeere nga balina kye beenyumirizaamu wamu n’okubawa emirimu nga bayita mu sacco zaabwe’

Brig General Muwanguzi N'akulira Abaana Ba Babajaasi Nakyejwe.

Bino byogeddwa kaamisona okuva mu minisitule y'ebyokwerinda n'ensonga za baazirwanako,  Micheal Wambi Mabonga bw'abadde mu nsisinkano n’abaana ba bajaasi ssaako abaazirwanako nga bano beegattira mu kibiina kyabwe ekya USHINDI.

Mabonga agambye nti nga minisitule y'ebyokwerinda bagenda kuteeka amaanyi ku baana ba baazirwanako nga  babawa ssente n'emirimu nga bayita mu sacco zaabwe kubanga bakizudde nga bangi basanga okusoomoozebwa okw'amaanyi era nga bano basobodde n’okuteekawo emiwaatwa mingi abaana ba baazirwanako we bayinza okuyita okufuna obuyambi.

Mabonga Micheal Wambi.

Brig. General Godfrey Muwanguzi coordinator wa operation wealth Creation mu Kampala nga yakiikiridde General Salim Saleh agambye nti baagala abaana ba bajaasi  okubeera obumu ate beenyigire mu bulimu basobole okweggya mu bwavu.

Ye Iren Nakyejwe omutandisi w'ekibiina kibiina kino yagambye nti bakyalina obwetaavu bungi okuva mu Gavumenti naddala obwa ssente kuba bingi bye balina okusomesa abaana bano okusobola okubeezaawo obulamu bwabwe.