MC Maswanku owa Bukedde TV abalinze e Buloba leero mu ndongo y’Ekisindogoma

KATAYIRA wa Bukedde Fa Ma era omukozi w’akanyomero k’emboozi za bodaboda ku Bukedde TV, MC Maswanku, waakugaba ebirabo eri abavuzi ba boda boda abanaasinga okutabbira emboozi za boda layivu. 

Bino bigenda kubeera mu kivvulu ky’Ekisindogoma kya MC Maswanku ku Dana Park e Buloba leero ku Lwomukaaga nga August 10.

Okuyingira kwa 10,000/- ne 20,000/- era zinaagenda okuwera ssaawa 1:00 ey’akawungeezi ng’emiryango gigguddwaawo ekifo kisindogome anti akutte endongo ttaano (5) n’azikuba mu kifo kimu.

Maswanku era egenda kugabira abavubuka abalina ekitone mu kukola obwakalabaalaba (MC) ebirabo okubazzaamu amaanyi n’okubasitula.

Awerekeddwaako bannannyini ndongo y’ebinyaanyanyaanya; Ssuuna Ben ne Mbaziira Tonny abagenda okukuba abadigize endongo basimbe akagere okumala ennaku bbiri okuva ku Lwomukaaga okutuuka ku Ssande.

Abayimbi abakulembeddwaamu Lil Pazo ow’enkudi, mmeeya Mathias Walukagga, Stabua Nattoolo, bakazannyirizi ba Mary Heart Tumbeetu, Maurana ne Reign, Ssenga Justine Nantume n’abalala nabo baakusanyusa abantu.

Maswanku abasabye mujje mu bungi munyumirwe ng’eno bwe muwangula ebirabo okuva mu bavujjirizi ng’abeebyokunywa bya Sabula, emifaliso gya rose Foam n’ebirala. Ekivvulu kitegekeddwa Joel Promotion ne kiwagirwa Bukedde TV, Bukedde Fa Ma, BClara Property Services, Sky pins.