Omukazi eyakuba bba n'amunyoola ebisimuluzo bya maka amwetondedde n'asaba badding'ane beerabire ebyayita

Omukazi eyakuba bba n'amunyoola ebisimuluzo bya maka amwetondedde ng'ayagala badding'ane

Taata w'abaana alayidde nti talisonyiwa mukazi we ng’agamba nti yamunyoola obusajja kumpi kubukutulako era nti buli lw'ajjukira nti omukazi yakwata ejjambiya ng’amaliridde okubusalako n'ebiyengeyenge bimuva mu maaso.

Collins Kafeero Eyatuuzizza Abafumbo Bano. 12121

Omukazi agambye nti bba yasiba emigugu n'asenga ewa nakyeyombekedde era nga mu bbanga ery'omwaka omulamba lye yabulawo, omukazi yali yeefuniddeyo omusajja amuwa saaviisi.

Richard Luweesi 40, agambye nti mukazi we Joyce Nanfuka 39, yamugoba n'ejjambiya ng’amwetoolooza enju era nti bwe yamukwata n’amumegga ekigwo n'amuvumbagatira ebisumuluzo by'amaka n'abinyoola ng’eno Luweesi bw'afa obulumi kyokka nga omukazi tamuta.

Luweesi agambye nti oluvannyuma yafuna amagezi n'akwata omukazi mu bulago n'amutuga olwo kwe kumwetakkuluzaako.

Abafumbo bano abalina abaana bana era batuuze ku kyalo Kisombwa mu Kayunga Town Council mu disitulikiti y'e Kayunga era nga twabasanze mu ofiisi ya Collins Kafeero ow'eddembe ly'obuntu omukazi gye yaddukidde ng’ayagala Kafeero ayogere ne bba akomewo awaka.

Nanfuka, yeetondedde bba amusonyiwe kubanga ne saaviisi omusiguze tagimuweera mu nyumba ye. Luweesi agambye nti omukazi amukozeeko ebikolobero bingi era nti lumu yamusaba jjuyisi omukazi n'afuka omusolo n'agussa mu giraasi n'agabula bba era yagenda okutegeera ng’amaze okusikako omumiro.

Nanfuka alumirizza Luweesi okupanga okumugoba mu maka aleete mukazi we gye yasenga. Wadde Luweesi yasoose n'alayira obutasonyiwa wabula oluvannyuma lw'okubuulirirwa nti akkaanye ne mukyala we basonyiwagane bakuze abaana, agambye nti asooka kwerowooza.

Kafeero awadde abafumbo bano amagezi ensonga z'amaka gaabwe baziggyemu ab'ekyalo wabula bazigonjoolerenga mu bantu abalina obukugu mu kutereeza amaka. Abajjukiza nti obutakkaanya bwabwe bukosa abaana era n'asaba omukazi akendeeze omumwa kubanga kizuuse nga kye kimu ku byagoba omusajja n'agenda asenga ew’omukazi omulala.