Aba NUP bakkirizza emisango

ABA NUP 16, abaludde nga bawozesebwa mu kkooti y’amagye kyaddaaki bakkirizza emisango egibavunaanibwa. Kkooti wiiki ewedde yayongezzaayo omusango ng’abantu 14 basabye bakyuseemu bakkirize misango kyokka eggulo bwe baakomyewo omuwendo gwalinnye ne bawera 16.
Abeeyongeddeko ye Olivia Lutaaya omukazi yekka abadde avunaanibwa ku fayiro eno ne Muydin Kakooza aludde ng’akol ku kkooti okuva lwe baakwatibwa.
Bano beegasse ku Rashid Ssegujja, David Mafabi, Robert Christopher Rugumayo, Abdul Matovu, Mesach Kiwanuka ,Simon Kijambu, Ibrahim Wandera, Stanley Lwanga, Steven Musaakaru, Ronald Kijjambu, Asubat Nagwere, Livingstone Katushabe, Matovu Sharif ne Swaibu Katabi era bakomezebwawo olwaleeronga basuubirwa okukkiriza
emisango.
Emisango gyazzeemu okubasomerwa ssentebe wa kkooti, Brig Gen Freeman Robert
Mugabe era ne bakkiriza ebibavunaanibwa. Kigambibwa nti abawaabirwa wakati wa November 2020 ne May 12, 2021, mu bitundu bya Jinja, Mbale, Kireka, Nakulabye,
Kawempe, Nateete ne Kampala Central baasangibwa ne bu bbomu obw’omu ngalo.
Bano era kigambibwa nti baawandiisa abantu n’okubatendeka mu bikolwa eby’ekiyeekera n’ekigendererwa ekyokuvuunika gavumenti. Omulamuzi yabawadde
lwa October 21, 2024 lwe banazzibwa mu kkooti.
Abawawaabirwa olwafulumye kkooti balinnye emmotoka ebazza mu kkomera ne bafukamira nga bwe balaajanira Pulezidenti Museveni abasonyiwe.
Baalumirizza Bobi Wine okubawubisa n’abakozesa nga bw’afuna ssente ng’ate bbo
tabayambye.
Kakooza yalajaanye “ nze musaayi gwa Bobi naye yankozesa bukozesa ng’ate y’afunamu.” Abalala bakira balaajana nga bwe beetondera aduumira eggye lya UPDF abasonyiwe, ate abalala nga bakowoola Minisita Balamu abeegayirireko pulezidenti.