Enfa ya Bishop Samuel Balagadde ekubye bannayuganda encukwe

OMULABIRIZI Samuel Balagadde Ssekadde ku mukolo gwe yasembye okubeerako nga tannafa mungeri y’ekibwatukira, yasabye abakungubazi okumuwaayo akadde abeeko kyayogera nga tannaba kwolekera lugendo lwe olumuzza e Ntebe.

Omulabirizi eyawummula Wilberforce Kityo Luwalira ng'ayogerako eri abakungubazi mu maka g'omugenzi e Ntebbe

Yabadde yeetabye mu kuziika Norah Karakire e Rushere- Nyabushozi ku Ssande n'agamba nti “kirungi okuba mu Mukama, kuba bwetufa, tufiira mu ye. Tomanyi nze addako, ggwe addako.” Ssekadde bweyayongeddeko.

Bwe yamaze okwogera ebyo, n'alinnya mmotoka ye okworekera e Ntebe- Bugonga gyabeera, abaabadde ku mukolo gw’okuziika baagambye nti Ssekadde yabadde mugumu nnyo era ng’ayogera bulungi.

Ebigambo bino bangi baabifumitirizza ng’amaze okufa, ne balaga nti kirabika yabadde asiibula ng’ayorekera eri Katonda we eyamutonda. Bangi baagambye nti Bp Ssekadde amaze emirimu gye, alwanye olutalo era akumye okukkiriza.

Abakungubazi abalala abaabadde abanakuwavu nnyo ate baatuuse ne baguma ne bagamba nti balina omukisa abo abafiira mu Mukama era ne bebaza Katonda obulamu bw’awadde Bp Ssekadde.

Ssekadde yafudde ku Mmande mu ddwaliro e Kisubi ku lw’e Ntebe gye yaddusiddwa ng’embeera ye ebizze era okusinziira ku baagenze naye mu ddwaliro, Ssekadde yafudde yakatusibwa e Kisubi.

Kityo Luwalira ng'abuuza ku bakungubazi

Andrew Nasasira omukuumi mu maka ga Ssekadde, yategezezza nti, Ssekadde ku Mmande yasiibye mulamu nnyo era (asikaari) yabadde asayira ebimuli nga banyumya bulungi nnyo.

Yagambye nti akawungeezi, Ssekadde yayambuse mukisenge kye ng’amutegezezza nti agenda kuwummulamu, kyokka yazeemu kulaba nga mukyala wa Ssekadde amuyita.

Nasasira ayongerako nti baayise muliranwa ajje ayambeko kumbeera, kyokka yatuuse amaanyi ga Bp Ssekadde gakendedde, kwekumuteeka mu mmotoka okumutwala mu ddwaliro.

Nti bano baatuuse e Kisubi ng’amaanyi gakendedde era abasawo ne bagamba abaamututte nti takyasobola kudda ngulu. Olwo nti zaabadde zigenze mu ssaawa 1;oo eyakawungeezi.

Omulabirizi Luwalira asabidde aba famire;

Eyaliko omulabirizi w’e Namirembe Wilberforce Kityo Luwalira leero akubagizza ku b’oluganda lw’omugenzi Ssekadde n'agamba nti “amawulire gano twaagalabye ku mutimbagano kyokka ne tutasooka kupapa kugakakasa kuba Social Media tetegerekeka.”

Oluvannyuma nti ng’obubaka bweyongedde, yakakasizza amawulire ago. asaasidde nnyo abantu bonna ababadde kulusegere lw’omulabirizi Ssekadde nasaba Mukama yaba abagumya mubuli kimu.

Ayogedde ku Bp Ssekadde ng’eyali omukulembeze ow’amaanyi eyatambuza obulungi obulabirizi wakati mukubuulira enjiri ey’omwoyo n’okukola eri abakristaayo bonna.

Asabye Katonda okunyweza ab’omunnyumba bonna, n'agamba nti wadde tuba n’okuzomoozebwa ssaako ennaku, naye Katonda eyatutonda yamanya buli kimu era akola ebintu mumbala ye.

Abakungubazi nga bakaaba

Yagambye nti okufa kutiisa era omuntu bwafa batandika kuguyita mulambo, nti naye Yesu eyawangula okufa yeyekka asobola okusangula amaziga, okukomyawo emmeme, era ye ggwanika ly’obulamu obutaggwawo.

Namirembe eraze enteekateeka y’okusiibula Ssekadde;

Leero obulabirizi bw’e Namirembe bwalaze enteekateeka z’okusiibula eyali omulabirizi w’e Namirembe, Balagadde Ssekadde mwe yategerezza nti omubiri gw’omugenzi gwatusiddwa mumaka g’omugenzi ku ssaawa 12;oo eggulo (Lwakubiri).

Enkya omubiri gw’omugenzi gwakutwalibwa ku kitebe ky’obussabadinkoni bw’e Ntebe ku kkanisa ya St Mark Namate ku luguudo lw’e Ntebe.

Oluvannyuma lw’okusaba, omubiri gw’omugenzi gwakutwalibwa e Namirembe nga gwakwanirizibwa diini wa Lutikko ye Namirembe, Rev Can Jonathan Kisawuzi olwo gutwalibwe mu Hannington Chapel.

Ku ssaawa 1;oo ey’olweggulo enkya wagenda kubaawo okusaba kw’okusembera, olwo ku Lwokuna wabeewo okusaba mu Lutikko e Namirembe okunaatandika ku ssaawa 4;oo ez’okumakya olwo okuziikibwa kubeewo ku ssaawa 8;oo ez’olweggulo.

Mulukungaana lwa bannamawulire olwaatuziddwa mu Lutikko e Namirembe eggulo, omulabirizi w’e Namirembe Moses Banja yasiimye emirimu Ssekadde gyeyakola bweyali omulabirizi.

Yalaze nti Ssekadde yakyusa bangi okubagaza eddiini y’obukristaayo, yazimba ekkanisa ez’enjawulo, amalwaliro, amasomero nebirara.

Banja yasabye mukama okugumya aba famire y’omugenzi era nasaba n’omugenzi amusonyiwe ebyaamusobako.