Poliisi erabudde abantu ku ggulu mu nkuba etandise okufudemba

Poliisi evuddeyo n'erabula abantu ku ngeri y'okwewala okukubwa eggulu naddala mu biseera bino eby'enkuba.

Kino kiddiridde abantu 14 okukubwa eggulu ne bafiira mu nkambi y'abanoonyi b’obubudamu e Parabeke zzooni 8 mu disitulikiti y'e Lamwo ate abalala 34 ne batuusibwako ebisago eby’amaanyi.

Mu ngeri y'emu era mu Abimu disitulikiti , omuwala ow'emyaka 15, Sharon Akello yakubiddwa eggulu naye n'afa.

Omwogezi wa poliisi mu ggwanga Kituuma Rusoke , agambye nti abantu tebateekeddwa kweggama nkuba nga bali wansi w'emiti.

Ayongeddeko nti omuntu okwewala laddu, alina okwekuumira munda mu bizimbe ate n'okwewala okusemberera ebyuma.

Awadde abatambulira ku mazzi amagezi , okweggama ku lukalu nti kuba amazzi nago ga bulabe.