Gavumenti eyongedde okununula Bannayuganda abalala ababadde mu makomera g'e Saudi

BANNAYUGANDA abalala 50 ababadde bavundira mu makomera g’e Saudi Arabia bakomezeddwawo awaka, nga kati gavumenti eri mu kaweefube waakununula abo abali mu makomera g’amawanga ga Buwalabu amalala.

Bannayuganda bano bajjidde ku nnyonyi ya Air Arabia, era baayaniriziddwa omwogezi wa minisitule y’ekikula ky’abantu Joshua Kyalimpa, ne ssentebe w’ekibiina ekigatta ebibiina ebirwanirira eddembe lya bankubakyeyo ekya Federation of all Migrant Workers Associations, Kenneth Oloka.

Kenneth Oloka Akulira Ekibiina Kya Federation Of All Migrant Workers' Associations

Kaweefube w’okununula Bannayuganda bano, awomeddwamu omutwe Pulezidenti Yoweri Museveni, eyateekawo ttiimu okugenda e Buwalabu okuteeseganya ne gavumenti zaayo ziyimbule Bannayuganda bano.

Ttiimu eno ekulemberwa Minisita omubeezi ow’abakozi n’emirimu Hon. Esther Davinia Anyakun, n’omuwabuzi wa Pulezidenti ku nsonga za bankubakyeyo Ambasada Hajji Abbey Walusimbi.

Walusimbi mu mboozi ey’akafubo gy’abaddemu ne Bukedde, agambye nti kaweefube gwe baliko ow’okununula Bannayuganda bano atambudde bulungi, era wiiki eno basuubira Bannayuganda abalala ababadde mu makomera g’omu United Arab Emirates, okusingira ddala mu kibuga Dubai ne Sharjah, okutonnya ku kisaawe e Ntebe.

Amb. Walusimbi Ku Ddyo, Minisita Anyakuni N'abakungu Abalala.

Walusimbi agamba nti gavumenti ya Uganda eri mu kufuba okulaba nga Bannayuganda bano abakomezebwawo, bafuna okubudaabudibwa nga tebannaba kubazzaayo mu maka gaabwe, n’okubawaayo ku buyambi obw’enjawulo nga bakolaganira wamu n’ekitongole ky’ensi yonna ekirondoola ensonga za bankubakyeyo ekya International Organisation for Migration (IOM).

Ye Kenneth Oloka yagambye nti okusinziira ku biwandiiko bye balina, Bannayuganda abasoba mu 200 bakyali mu makomera mu mawanga ga Buwalabu ag’enjawulo, era nga beetaaga okuyambibwa.

Ajjukizza gavumenti ku Bannayuganda abalala abali ku kibonerezo ky’akalabba, e Saudi ne Jordan okuli Juma Kasumba, Nuhuwat Nambi, Kamada Musoke, Zainat Alinda ne Innocent Neema, nti nabo beetaaga amaanyi ag’enjawulo okusobola okubanunula.

Abawala Nga Bali Ne Kenneth Oloka Akulira Ekibiina Ekirwanirira Eddembe Lya Bankubakyeyo Ekya Federation Of All Migrant Workers' Associations

Walusimbi era agumizza ab’enganda za Bannayuganda abali ku bibonerezo by’akalabba, nti ensonga zaabwe gavumenti ya Uganda eri mu kuzikolako, era waliwo ttiimu egenda okuddayo mu January w’omwaka ogujja.

Eno egenda okwongera okusala entotto ku ngeri gye bayinza okuyambibwamu, kubanga baasabye Abawalabu baleme kutta bantu bano mu kiseera kino, nga bwe balwana okubataasa, era nabo baakikkirizza.