Abasoba mu 5000 bamaze okwewandiisa okwetaba mu mpaka za Miss ne Mr Bukedde 'Linnya Ebbaati'

BANNABITONE abali eyo mu 5000 be beewandiisizza okwetaba mu mpaka za Miss ne Mr Bukedde sizoni eyokuna.

Abawanguzi bombi Miss ne Mr. baakubuukawo n’ekyapa ky’ettaka buli omu n’okulinnya ennyonyi bagendeko e Dubai balambule.

Praise Wisdom ,miss Bukedde Sizoni 3 Ng'akookera Abaabaddewo..jpg11

Sizoni eno etuumiddwa ‘Miss ne Mr Bukedde Linnya Ebbaati’ era ewagiddwa aba Njovu Estate Developers e Nansana abawaddeyo ebyapa by’ettaka, AL' Hassan Tours and Travel ku Equatorial Mall abagenda okutwala abawanguzi e Dubai, Sumz abakola obumpwankimpwaki ne Mariam’s Fashion e Bwaise abagenda okwambaza abasazi b’empaka n’abakontanyi abanaatuuka ku kamalirizo.

Okuva Ku Kkono Chris Kibuuka Ssentebe Wa Njovu Estate Developers E Nansana ,ddayirekita Wa Njovu Gerald Batte Ne Richard Kayiira Maneja Wa Bukedde Tv.

Empaka zaatongolezedddwa Nansana ku kizimbe kya Nansana Business Center nakyo eky’omugagga Gerald Batte Njovu owa Njovu Estate.

Maneja wa Bukedde TV1, Ssaalongo Richard Kayiira yasinziidde wano n’asiima abavujjirizi abeegasse ne Bukedde mu mpaka zino.

Mr. Bukedde Sizoni 3, Musomesa Ssemakula Ng'ayimba.

Kayiira yagambye nti ez’omulundi guno zongeddwamu eky’enjawulo kubanga ng’oggyeeko eky’okuwangula ettaka, ate abawangizi abana 4 abanaasinga Miss ne Mr. wamu n’abamyuka baabwe bonna baakulinnya ennyonyi okugenda e Dubai okulikoodinga ennyimba mu sityudiyo ey’omulembe.

Ba Miss ne Mr Bukedde abazze bawangula empaka eziyise okuli Omumbejja Elizabeth Ndagire miss Bukedde sizoni 1, Praise Wisdom miss sizoni 3 ne Ssemakula Mr. sizoni 3 wamu n’omuyimbi Tom Dee baayimbidde abeetabye ku mukolo guno ennyimba ez’abacamudde.

Gerald Batte Dayirekita Wa Njovu Eastate E Nansana N'abavujjirizi Abalala Nga Batongoza Miss Ne Mr. Bukedde Sizoni 4.

Ndagire yagambye nti bukya yawangula empaka zino mu ssizoni eyasooka obulamu bwe bwakyuka era kati alina w’atuuse kubanga yafuuka boosi eyeekozesa nga kati alina bandi ye eya Xavier Band n’asibirira entanda eri abakontanyi abagenda okubbinkana okwekkiririzaamu.

Praise Wisdom miss Bukedde owa sizoni ey’okusatu agambye nti ekitiibwa kye yawangula kikyusizza nnyo obulamu bwe kubanga kyamuggulirawo enzigi nga mu bbanga ttono ng’atambudde amawanga mangi n’okutuuka ku binene bingi.

Tom Dee Ng'ayimbira Abantu.

Gerald Batte dayirekita wa Njovu abaawaddeyo ebyapa bya bawanguzi yatenderezza Bukedde n’ategeeza nti okuva bwe yaggyegattako by’akola byayongera okutitimuka naye kwe kusalawo okutambulanga nayo ebbanga lyonna.

Mariam Namubiru Ssewamala owa Mariam’s Fashions e Bwaise, agenda okwambaza abasazi b’empaka n’abakontanyi yategeezezza nti omulundi guno empaka zino zikomyewo nga za njawulo era n’ennyambala egenda kuba ya njawulo n’asiima olw’omukisa ogwamuweereddwa ne ku mulundi guno okuddamu okwambaza abantu bano.

Sandra Nganda Ne Hassan Nganda Ceo Wa Al' Hassan Tours And Travel Nga Boogera Ku Mukolo Gw'okutongoza Empaka Zino Asooka Ku Ddyo Ye Maneja Wa Bukedde Tv Richard Kayiira Ssaalongo.

Aba Sumz abakola obumpwankimpwaki nga bakulembedwa Geoffrey Sserugga Matovu, yagambye nti nabo empaka z’omwaka guno za njawulo gye bali kubanga nabo bagenda kubeera nga bajjaguza emyaka 15 okufaananako ne Bukedde TV era baakuwa abawanguzi ebirabo.

Hassan Nganda akulira, AL' Hassan Tours and travel yakakasizza nti abawanguzi bagenda kutwalibwa e Dubai bafune ekisingayo obulungi era n’asiima enkolagana ennungi gye balina ne Bukedde era n’akubiriza Bannayuganda okubatuukirira ku maka gaabwe ku Equatorial Mall babakoleko.