Baddereeva ba takisi basitudde enkundi ku bipapula bya poliisi

BADDEREEVA ba takisi basitudde enkundi ku bipapula bya poliisi y’ebidduka bye balumiriza nti byetobeseemu emivuyo era baagala ensonga eno, Pulezidenti Museveni agiyingiremu nga tennasajjuka!

Ekibinja kya baddereeva beesitudde ne bagenda ku ofiisi za UTOF ne basisinkana ssentebe Rashid Ssekindi n’omumyuka we Musitafa Mayambala ne babalaga kye baayise obujulizi obulaga nti ebipapula poliisi by’ebakuba bingi, si bituufu.

Ssenkindi Ng'ayogera.

Abamu ku baddereeva baabadde baleese ekiteeso okwekalakaasa leero ku Mmande kyokka Ssekindi n’abakakkanya nti ensonga agenda kuzituusa ku ba gavumenti zigonjoolwe ewatali kwereega bikya.

Omu ku ddereeva Urban Tuzarirwewa, ow’oku siteegi y’e Makerere mu paaka enkadde yannyonnyodde Ssekindi ne Mayambala nti ensonga y’ebipapula ebasusseeko era yeetaaga Pulezidenti agiyingiremu ng’ekiwundu tekinnasamba ddagala.

“Nze katono mpunge bwe nagenze okukeera ku Lwokubiri nga mmotoka yange erina ebipapula bya poliisi munaana nga biraga nti byampeereddwa mu kifo kye kimu, mu ssaawa ze zimu ate ku musango gwe
gumu, ekitasoboka,” Tuzarirwewa bwe yategeezezza.

Yayongeddeko nti; “Okumanya ebipapula bino birimu emivuyo, wadde ku mmotoka yange byateereddwaako ku Lwokubiri naye biraga nti byafuluma mu August 2024 kyokka tekuli fayini eri mu mateeka omuntu gy’alina okusasula ng’ennaku 28 ziyiseeko nga tasasudde.”

Abubakari Kasiramu, ddereeva wa takisi era defensi mu ppaaka mu Kisenyi agamba nti; “Mmotoka yange No. UBD 372M, yalina ebipapula 15, naye bwe bagamba nti mmotoka erina ebipapula tegenda kufuna nnamba ya digito
empya ne nsalawo mbisasule byonna era nasasulako ebipapula 12, omulundi gumu.”

Ssekindi yagambye nti; “Ensonga ya baddereeva gye boogerako ntuufu era kino kya tandika mu 2013, ku mulembe gwa Gen Kayihura n’eyali akulira poliisi y’ebidduka, AIGP/ Styeven Kasiima.

Yagambye nti alina obukakafu ku mmotoka eziwera ziyita mu buzibu buno kuba alina ne mmotoka gy’amanyi bagikubye ebipapula musanvu mu kifo kye kimu, mu biseera bye bimu, ku musango gwe gumu ekiraga nti wandibaawo obuzibu.