Anaavuga mmotoka nga tolina kkaadi yaayo waakuwa engassi ya mitwalo 4!

ADUUMIRA poliisi y’ebiduuka mu ggwanga AIGP Lawrence Niwabiine awadde amagezi buli alina ekidduka okuyita ne kkoopi ya kkaadi yaakyo n’agamba nti bw’ozza omusango ne bagikusaba nga togirina, nagwo musango.

Niwabiine Ng'annyonnyola.

“Buli mugoba okuyita ne kkoopi ya kkaadi y’emmotoka ye kibaddewo mu mateeka lwakuba poliisi ebadde tekiteeka nga mu kuuma kaayo akakuba ekipapula aka ‘EPS” naye kati mukimanye nti twakitaddemu” Niwabiine bwey ategeezezza Bukedde mu mboozi eyakafubo.

 Niwabiine yagambye nti ne bw’obeera oguze takisi n’ogiwa ddereeva  akunoonyeze ssente olina okumuwa kkoopi ya kkaadi yaayo agiteeke mu ttakisi eno.

Buli nannyini mmotoka yenna akimanye nti bw’ogula mmotoka eno waliwo ebbanga erikuweebwa okugikyusa okudda mu maanya go nga singa tokikola nagwo gubeera musango era suubira poliisi y’ebiduuka okubonereza.

Kkaadi y'emmotoka bw'efaanana.

Yayongeddeko nti omuntu yenna ssinga onaawa mukwano gwo mmotoka, mukyala wo oba bbaawo mmotoka yo nga teri mu mannya ge poliisi ejja kumutwala nga ddereeva wo oba nga bwe wandibadde ne ddereeva wo.

Wabula Niwabiine yagambye nti si musango omuntu yenna okuvuga emmotoka etali mu mannya ge, era  poliisi tejjanga kukwata olwokuba tolina kkaadi eno wabula ssinga onaabeera ng’olina omusango gwonna ogw’oku luguudo gw’ozizza.

Yagambye nti ekipapula kye baakubye omugoba ataabadde na kkoopi ya kkaadi mu mmotoka ku “Old Port Bell” road mu Kampala ekyasasamazza eggwanga akimanye nti alina okukisasula kubanga singa yasangiddwa nayo yandibadde tasasula.