Ebimotoka by'amafuta 3 bigudde ne bisannyalaza ebyentambula

TULEERA ssattu ezitambuza amafuta zikoze obubenje ku luguudo busatu; ku lw’e Masaka, olw’e Iganga n’e Mityana ne zisannyalaza eby’entambula. Obubenje buno bwabaddewo ku Lwomukaaga, ebimotoka bino bwe byakutte omuliro ne bibengenya nga biri ku luguudo, ekyaleeseewo akalippagano k’ebidduka nga poliisi erwana okuzikiza omuliro.
Ku luguudo lw’e Mityana, akabenje kaaguddewo ku ssaawa nga 1:00 ey’oku makya, ku mugga Kizzikibi oguli okumpi ne tawuni y’e Kiwawu nga ze mayiro nga 20 okutuuka mu tawuni e Mityana. Tuleera eyakoze akabenje eri nnamba UBJ 585G, nga kigambibwa nti yabadde eva Busia ng’edda Mityana ne Mubende, gye yabadde etwala amafuta.
Ronald Kaati, omu ku baabadde batambulira mu kimotoka kino yagambye nti baabadde bavuga ne bawulira omupiira ogumu ogw’emabega nga gulinga ogwewagala kwe kuyimirira bagukebereko. Olwatuuse ebweru, baalabye omuliro omutonotono nga guva mu lupanka, ne bagezaako okuguzikiza ne gubalemerera. Ddereeva wa mmotoka eno yalabye biri bityo n’adduka, wadde nga tewaabadde muntu amuvunaana kukola kabenje.
Abatuuze abaabadde okumpi, baakubidde poliisi y’e Mityana n’ejja kyokka ekimotoka kyayo ekizikiza omuliro kyafiiridde mu kkubo era ebimotoka ebyazikizza omuliro byavudde Kampala.
l Ku luguudo oluva e Kampala okudda e Masaka, ekimotoka ky’amafuta kyakutte omuliro mu bitundu by’e Mpambire ne kisanyalaza eby’entambula mu kiro ekyakeesezza eggulo ku Ssande.
l Ate e Iganga, ekimotoka ky’amafuta kyagudde emipiira ne gidda waggulu ku luguudo oluva e Iganga okudda e Bugiri ne kiziba ekkubo era bantu baabadde batandise okusena amafuta kyokka poliisi n’ebatangira.
Omwogezi wa Poliisi y’ebidduka, Michael Kananura yagambye nti poliisi yasobodde okuzikiza ebimotoka byombi ne yeebaza abakozesa enguudo zino olw’okwolesa empisa ne bataleetawo kavuyo akaabadde kayinza okuvaako okufiirwa obulamu. Obubenje buno bwonna tebwafiiriddemu bantu.