Poliisi ekoze ekikwekweto ku bitaala by'omu Kampala okukwata abatagoberera mateeka

Poliisi y'ebidduka, ekoze ebikwekweto eby’enjawulo okumpi n'ebitaala mu Kampala, okukwata ab’ebidduka abatagoberera mateeka.

Ku bitaala ebipya ebya Jinja road mu Kampala okumpi ne ofiisi za vision Group ,waliwo abaakwatiddwa nga baweterawo okudda awalala kye bayita U- turn ekitakkirizibwa.

E Nkumba ku bitaala ku luguudo lw'e Ntebe, baddereeva abawera nga 15, bakwatiddwa ne babaggalirwa Ku poliisi e Ntebe nabo, lwakuweterawo ne badda ku mukono omulala, ekitakkirizibwa.

Omwogezi wa poliisi y'ebidduka, Micheal Kananura, agambye nti ekifo ky'e Nkumba ku bitaala, wafuuse kattiro olw'obulagajjavu eri abeebidduka.

Abamu ku baddereeva abakwatiddwa babadde bavuga emmotoka okuli UBF 654 H Mark X, Vincent Lugemwa, UAV 839 U premio Benson Nsubuga.

Abalala ye Daniel Bakalangudde avuga mmotoka UBF 444 Fielder,  Brian Lukundo ng'avuga nnamba UBP 854 F Isis, Edson Ssekamwe abadde mu Pajero nnamba UBG 766U n'abalala.