Abachina baggyiddwako envumbo okukola enguudo ze Mukono

Kampuni ekola enguudo eya China Communications Constructions Company Limited egyiddwaako envumbo gye baagissaako okumalira ddaala essabiiti bbiri nnamba nga tebakola mirimu, oluvanyuma lw’okuva ku byakaanyizibwaako mu ndagaano ekyaviirako n’omu ku bakozi babwe Ambrose Niwamanya okulugulamu obulamu omwezi oguwedde.

Kigambibwa nti ono yafa oluvanyuma lwa tulakita erima enguudo okumukoona mu kiseera bwe baali nga bakola emirimu n’afuna ebisago eby’amaanyi, ebyamuviirako okussa ogw’enkomerero nga yakatuusibwa mu ddwaliro.

Minisitule ya Kampala evunaanyizibwa ku nteekateeka ya pulojekiti eya Greater Kampala Metropolitan ng’eri wamu ne munisipaali y’e Mukono gye buvuddeko, baabaga ekiwandiiko ekiyimiriza kampuni eno ekyaali kibeemulugunyaako olw’okulemerererwa okussaawo eby’okwerinda ebigumu eri abakozi ebibakugira okufuna obubenje mu kiseera nga bakola n’ensonga endala eziwera.

Okusinziira ku town Clerk wa munisipaali y’e Mukono Francis Byabagambi agambye nti kampuni eno yateereddwaako obukwakkulizo, ng’obumu ku bbwo basobodde okubutuukiriza omuli okuddaabiriza ttulakita ezirima enguudo n’okusizzaawo abakozi embeera ennungi ebasobozesa okukola omulimu gwaabwe awatali kutataaganyizibwa.

Omukugu mu by’obutonde okuva mu minisitule y’e kampala Bruce Rukundo anyonyodde nga bwe bali mu nteekateeka okwogera n’abakulu mu kitongole ekivunaanyizibwa ku by’obutonde bw’ensi okulaba nga kkampuni ekkirizibwa okukola obudde bwonna kibasobozese okumaliriza omulimu guno mu bbanga eryabaweebwa world Bank.

Kampuni eno yakaweebwa obuwumbi 46 okukola oluguudo okuva e wantoni-kame, Cathedral Rise, kame Nabuti katosi road Admin Link, Access Road  ne Link Road oluwereza ddala kilomita 8.3.