Nnaabagereka asoomoozezza abazadde abakweka abaana abaliko obulemu

NNAABAGEREKA Sylivia Nagginda asabye abazadde obutakwekanga baana baliko obulemu kubanga singa babeera balabiriddwa bulungi, basobola okuvaamu abantu ab’omugaso mu ggwanga.

Nnaabagereka agamba nti waliwo amasomero agatandikiddwaawo nga gabangula abaana ekikula kino nga Masaka School for the Deaf nga gakola kya muwendo okusomesa abaana abaliko obulemu. 

Nnabagereka Ng’ali N’abayizi Ba Masaka School For The Deaf.

Okusaba kuno yakukoze ku bijaguzo by’emyaka 20 bukya ssomero lya Bakiggala erya Masaka School For The Deaf mu kibuga Masaka, litandikibwawo n’agamba nti enkola y’ebintu wano, ekwataganira ddala bulungi n’emiramwa gya Nnaabagereka Development Foundation.

Omwami w’essaza ly’e Buddu, Pookino Jude Muleke ye yatuusizza obubaka bwa Minisita w’enkulaakulana y’abantu era avunaanyizibwa ku ofiisi ya Nnaabagereka, Coltlida Nakate Kikomeko eyakunze abantu okutwala okusomesa abaana bonna awatali kwawulamu ng’ekikulu kuba Obwakabaka kati buli emitendera byonna egy’amasomero okuva ku nnasale okutuuka ku Yunivasite.

Omukulu w’essomero lino, Sarah Nakabuye agamba bafubye okulaba ng’abaana bano bamanya eddembe lyabwe, abazadde nga bamanya obukulu bw’okubasomesa n’okubalabirira n’okuyigiriza abantu mu Masaka, ebifa ku mbeera y’abaana bano.