‘Temulyazaamaanya ssente za PDM

PULEZIDENTI Museveni asabye abantu abeewola ssente ku nkola ya Parish Development Model (PDM) beekubirizenga okuzizza, ensawo za zi SACCO zisobole okweyongera okugaziwa.
Omukulembeze w’eggwanga eggulo ku Lwokubiri eyatandise okulambula emirimu egitandikiddwaawo ku nkola ya Parish Model mu Luweero, yagambye nti ssente Gavumenti z’ezze efulumya ku nkola eno tezikyaddawo mu ggwanika ng’era zijja kusigala mu nsawo za zi SACCO.
Yasinzidde ku kyalo Kikoma ekisangibwa mu Town Council y’e Wobulenzi, ng’eno yasanzeewo omukyala Damalie Nakayenga omu ku batuuze abaakaganyulwa mu nkola eno.
Nakayenga eyawolebwa akakadde kamu n’atandikawo pulojekiti y’okulunda enkoko ez’ennyama, era amagoba ge yafunamu gamusobozesa okugaziya bizinensi ye nga kati aweza enkoko 400 n’embizzi 5.
Museveni mu kusiima Nakayenga olw’okukozesa obulungi ensimbi ze yeewola, yamuwadde obukadde 10 nga ekirabo n’amwongera n’obukadde obulala 10 agule tukutuku emuyambe ku by’entambula.
Museveni yagambye nti Gavumenti yaakugenda mu maaso n’okusindikiranga buli SACCO obukadde 100 buli mwaka nga mu bbanga lya myaka esatu egijja buli SACCO ey’omuluka ejja kuba erina obukadde 500 mu nsawo yaayo.
Yagambye nti mu bbanga lye limu, obukadde 300 ezaawolebwa bammemba zijja kuba zikomezeddwaawo ng’era buli SACCO ku muluka ejja kuba n’obukadde 800 mu nsawo yaayo.
Yagambye nti kino kijja kuwonya Bannayuganda okugendanga mu bammanerenda ababaddenga babaggyako amagoba amangi.
Museveni yagambye nti Gavumenti ya Uganda nga tennaleeta nkola ya PDM, egezezzaako enkola endala nnyingi nga: Entandikwa, NAADS, Operation Wealth Creation (OWC) naye zonna zizze zikwatibwa bubi ne zitayamba bantu kubaggya mu bwavu.
Yagambye nti kibaddenga kiva ku baddukanya pulogulaamu ezo okukwata obubi ssente nga bazezza mu kifo ky’okuzizza mu bantu.
Yagambye nti olw’ensonga eyo, Gavumenti yasalawo okuleeta enkola ya PDM nga ssente ziweerezebwa butereevu mu zi SACCO z’emiruka ne wataba baziwuwuttanya.
Museveni yawadde abantu amagezi basinge kuyaayaanira nfuna ya mu maka okusinga okuyaayaanira eby’enkulaakulana ey’awamu gamba nga enguudo.
Yagambye ebintu nga enguudo ennungi ne bwe zibaawo obwavu tebugaana kuluma muntu kubanga enguudo ennungi ssi ze zireeta ssente mu nsawo z’abantu ssekinnoomu wadde ng’abantu baziyaayaanira.
Omutabaganya w’enkola ya PDM mu disitulikiti y’e Luweero, Dr. Andrew Kidda Makubuya yategeezezza nti amaka agawerera ddala 280,000 ge gaakaganyulwa mu nkola eno.
Yagambye nti ssente eziwerera ddala obuwumbi 26 ze zaakaweerezebwa mu Luweero kasookedde enkola eno etongozebwa mu 2022.
Kidda yagambye nti enkola eno egunjudde Bannaluweero mu ngeri gye bakwatamu ssente wamu, n’okulinnyisa omutindo gw’embeera mu maka.
Ate omumyuka wa ssaabawaandiisi wa NRM , Rose Namayanja yagambye enkola ya PDM esobozesezza abantu okuyiga nti omuntu asobola okutandika n’akakadde ka ssente n’alandira okwo nga Nakayenga bw’asobodde okukola.
Museveni bwe yavudde ewa Nakayenga, yakyalidde abalimi abalala ku kyalo Sekamuli mu Bamunaanika n’alambula n’abalimi abalala e Nakaseke.
Olwaleero asuubirwa okugenda mu disitulikiti ye Nakasongola okulambula abalimi n’abalunzi.