'Abavubuka mwewale okwagala eby'amangu, mukole'

BANNAYUGANDA basabiddwa okwongera okukuuma emirembe, obutanaayiza ntalo n’okwagala gavumenti eriko eya NRM kisobozese eggwanga okukulaakulana n’obutadda mabega okuva kw'ebyo ate gavumenti bye yatereeza.

Bino byayogeddwa Minisita omubeezi owa Northern Uganda, Grace Freedom Kwiyuacuiny bwe yabadde ku matikkira ga munnabyabufuzi Earnest Benjamin Kivumbi e Namasuba ku mukolo gw'okufuna diguli ye ey’okubiri mu bukulembeze eya “Public Administration”.

Kwiyuacuiny agamba nti gavumenti yalwana nnyo okulaba nga ettebenkeze eggwanga ng’erwanirira emirembe n’enkulaakulana, kuno kw'oteeka okukola enguudo mu buli kasonda k’eggwanga akenjawulo ekiyambye okwanguya mu byentambula by’eggwanga.

“Waliwo ekiseera nga bw'obeera ogenda mu bitundu by’omu mambuka g’eggwanga nga kikutwalira ennaku musanvu, kino kyaviira nga ddala ku butabanguko n’enguudo. Mu kiseera kino omuntu asobolera ddala okutuuka mu mambuka g’eggwanga awatali kutataaganyizibwa olw’emirembe egiri mu ggwanga n’enguudo enkole,” Kwiyuacuiny bwe yagambye.

Minisita yakuutidde abavubuka obutayagala byamangu ekibaleetera okwenyigira mu mize emikyamu wabula bafube nnyo okukola n’okwenyigira mu nteekateeka ennungi gavumenti z’ebeera ebaleetedde okubakulaakulanya ng’abavubuka.

Kivumbi eyatikkiddwa diguli ye ey’okubiri mu bukulembeze ‘Public Administration’ nga ye pulezidenti wa Heal the Planet, ekitongole ekikwatirako abantu okukyuusa embeera z’abantu yakuutidde abakulembeze okufaayo okukola ebyo ebikulaakulanya ebitundu gye bawangalira n’okukyusa ebifo ebyo bye baweereza bifuuke eby’obuvunaanyizibwa.