KCCA eboye emmere y'abafumbi abakolera mu kikuubo kya Kinnamwandu

ABAFUMBI b’emmere mu Kikuubo kya Kinnamwandu bakiguddeko KCCA bw’esindise abaserikale baayo ne babowa ebintu byabwe omuli n’emmere gye babadde bateeseteese okugabula bakaasitoma.

Kasasiro W'emmere Gwe Bagambye Avaako Ekivundu.

Bino byabaddewo eggulo abaserikale ba KCCA nga bawerekerwako abapoliisi abakkakkanya obujagalalo bwe bagenze mu Kinnamwandu okugoba abafumbira mu kikuubo kino  wamu n’abasiika chapati saaako abatundirayo ebintu.

Abaserikale ba KCCA olwatuuse mu Kinnamwandu baasanze waliwo abasiikirayo chapati , abali mu kuwaata ate abalala nga bali mu kunyiga mmere wamu n’ababadde bayita bakaasitoma okusobola okubaguza emmere ne babalagira obutabaako kintu kyonna kye batwala byonna ne babitikka ku mmotoka.

Omu Ku Baakwatiddwa Nga Bamulinnyisa Kabangali Ya Kcca.

David Ojur eyakulembeddemu abaserikale ba KCCA yagambye nti okukola ekikwekweto kino kyaddiridde okukizuula ng’abafumbira mu kifo ekino bwe bazibye ekikuubo saako n’kumansa ebicaafu ekiviuddeko ekivundu.

"Waliwo ababadde bafumbira n’kutundira ebyokulya mu kikuubo kya Kinnamwandu ekintu ekitakkirizibwa kwe kusalawo okukola ekikwekweeto okubagoba kuba abamu ku bo babadde bateekamu ensawo z’amatooke, ensawo z’amanda ekintu ekitakkirizibwa" Ojur bwe yategeezezza.

Yagambye nti era abantu bano nga abasinga bakyala babadde bamala gayiwa amazzi ge bamaze okwozaamu ebintu nga mulimu ebimere ekiviirako amazzi okulegama ne kivaako ekivundu.

Yategeezezza nti mu kikwekweto kino ebintu byonna byaboyeddwa omuli ebimeeza sigiri, ensawo z’amanda n’amatooke byatikkiddwa ku loole ne bitwalibwa mu yaadi ya KCCA ne Nakawa.