Sheikh Mubajje asabye Abasiraamu okwewala okwenyigira mu bikolwa eby’obutujju.

KU kitebe ky’obusiraamu ku muzikiti gwa Old Kampala, okusaala Eid kwakulembeddwamu mufti wa Uganda Sheikh Ramadhan Mubajje n’akubiriza Abasiraamu okwewala okwenyigira mu bikolwa eby’obutujju.

Mubajje ng'akulembeddemu okusaala ku Old Kampala ku muzikiti.

Mubajje mu kwogera kwe yakuutidde Abasiraamu okukuuma emirembe n’obutebenkevu n’agamba nti Obusiraamu ddiini ya mirembe kyokka kibi nnyo kubanga buli kikolwa eky’obutujju ekibaawo mu Uganda kuteekwa okubeerako erinnya ly’Omusiraamu.

Ayozaayozezza abantu okutuuka ku Eid era n’abakuutira basaddaake ebisolo era basaddaake ebyo ebiramu ate n’abaweereddwa ebisolo okubisadDaaka, Mubajje abasabye baleme kutunda nnyama naye bagigabe bugabi olw’ensonga okugitunda kikontana n’eddiini.

Nnamungi w'omuntu eyeeyiye ku muzikiti

Asiimye gavumenti ekulemberwa pulezidenti Yoweri Kaguta Museveni olw’okuwagira Abasiraamu 100 okugenda e Mecca kyokka n’alaga okwennyamira olw’emivuyo egyetobekamu naddala enguzi ekyaviiriddeko abamu ku Basiraamu okulemesebwa okugenda.

Okusaba kwetababiddwamu abantu ab’enjawulo era ng’ebyokwerinda bibadde binywezeddwa butiribiri ng’ebitongole by’ebyokwerinda okuli poliisi ya bulijjo ,poliisi erwanyisa obutujju wamu n’amagye babadde bayaza butiribiri buli muntu abadde ayingira omuzikiti era abamu ku babadde n’ebintu ebisobola okuba eby’obulabe gamba nga zi makansi, endabirwamu n’ebirala nga tebakkirizibwa kubiyingiza.