Kalebule wa Tik Tok asibizzza amyuka disitulikiti khadhi

AMYUKA Disitulikiti Khadhi mu Iganga asuze mu kkomera e Luzira lwa kusinziira ku Tik Tok n’ayita abakazi bamalaaya.
Uthuman Shaban Ngobi, 39, omutuuze w’e Luuka mu munisipaali y’e Iganga ye yasimbiddwa mu maaso g’omulamuzi wa kkooti ya Buganda Road, Ronald Kayizzi amusomedde emisango 4 gyonna n’agyegaana.
Kigambibwa nti, mu Aprilm 2025 ku luguudo lwa George Street mu Kampala wamu
n’ebitundu bya Iganga, Ngobi yasaasaanya obubaka obusiga obukyayi ng’akozesa ebyumabi kalimagezi ku mukyala ayitibwa Ahmed Shifah ne baganda be nti, be batta taata waabwe kati omugenzi Ahmed Salimin.
Kuno yagattako okubalebula ng’abayita bamalaaya ne maama waabwe, abasamize
wamu n’okutta taata waabwe ekikolwa ekyattattana ekitiibwa kyabwe ng’abakyala.
Emisango emirala kigambibwa nti, Ngobi yasindika obubaka obusiga obukyayi ng’akozesa kompyuta wamu  n’emikutu egy’enjawulo okuli Tik Tok n’ategeeza nti, Shifah ne bagenda be, beenyigira mu kutta taata waabwe era nti, ne maama waabwe yeetunda ate alina akawuka ka siriimu.
Emisango gyonna yagyegaanyi era omuwaabi wa Gavumenti mu musango guno Ivan Kyazze yategeezezza kkooti nga okunoonyereza bwe kuwedde, n’asaba kkooti
okubawa olunaku okutandika okuguwulira kuba babadde bazze beeteeseteese okuwa obujulizi naye oludda oluvunaanibwa baabadde tebaaluwadde mpaaba ya kkooti kwe bagenda kusinziira kuwa bujulizi.
Omulamuzi omusango yagwongeddeyo okutuusa nga June 24, 2025 okuddamu okusaba kw’enjuyi zombi.