Abadde agezaako okubba RPC w'e Rwizi akubiddwa amasasi n'afiirawo!

OMUSAJJA omu akubiddwa amasasi agamusse n'abalala ne badduka ku bigambibwa nti babadde bagezaako okutaayiza RPC w'e Rwizi okumubba.

Bibadde ku kyalo Mbaguta Cell mu Ruharo ward mu Kibuga Mbarara, ababbi abagambibwa okubeera abeebijambiya nga batambulira ku pikipiki, bwe bafumbiikirizza RPC SSP Alfred Bagambaki nga y'akatuuka ewuwe mu mmotoka, n'ekigendererwa eky'okumubba.

Kitegeezeddwa nti omu ku bazigu, akubye emmotoka n'agyasa endabirwamu ku ggeeti , era wano w'amukubidde amasasi agamusse banne abalala ne badduka.

Omwogezi wa poliisi mu ggwanga, Kituuma Rusoke, ategeezezza nti batandise okunoonyereza okuzuula byonna ebyabaddewo n'okuyigga abalala, abali embega w'obulumbaganyi buno.

Kigambibwa nti omu bwe babadde ne RPC mu mmotoka nga bava ku party, Areba Munda, afunye obuvune , endabirwamu bwe zimusaze. Omulambo gw'oyo attiddwa, gutwaliddwa mu ggwanika ly'eddwaliro e Mbarara, okugwekebejja.