Majembere ayongedde amaanyi mu kunoonyeza Pulezidenti Museveni akalulu mu Lubaga

SSENTEBE wa NRM mu Lubaga Ivan Majambere Kamuntu Ssemakula, ayongedde kaweefube okukunga ba ssentebe b'ebyalo aba NRM mu Lubaga okwongera okufeffetta akalulu ka pulezidenti Museveni wansi ku ground.

Majembere ng'ayogera n'abawagizi ba NRM

Omulundi guno ayingidde Lubaga North e Kasubi ne Namungoona naasisinkana abaayo, naayongera okunyikiza enkola y'okunoonya akalulu ka pulezidenti Museveni nju ku nju, nabakuutira okugenda okulonda mu bungi buli omu akubgeyo abalala 10 balonde Museveni ate bwebamala okulonda baveewo badde ewaka batuule ku TV zaabwe ne leediyo balinde ebinaava mu kulonda kubanga abeby'okwerinda bajja kubaawo okukuuma embeera y'akalulu ako okutuuka gyekaggweera.

Majembere ng'awaayo ebipande bya Pulezidenti Museveni

Majambere asabye ba ssentebe b'ebyalo mu Lubaga North okweggyamu enkwe bakwasize wamu okuwagira pulezidenti Museveni n'abakwatira  NRM bendera, baasobole okuwangulira waggulu mu kulonda okujja.
N'ategeeza nti kaweefube wa pulezidenti Museveni mu kisanja ekiddako wa kulaba nga buli muntu  abeera bulungi n'okwongera okukulaakulanya eggwanga, nti kale beerwaneko beeggye emiguwa mu bulago batebuke abawuddiisa abantu.

Majembere ng'awaayo ebipande bya Pulezidenti Museveni

Justine Buchana Namakula, omukunzi  wa NRM e Lubaga, asabye abantu naddala abaganda okulonda enyo pulezidenti Museveni kubanga yeeyakomyawo obwakabaka obwali bwaggyibwawo, naabasaba baleme kubuzaabuzibwa bannabyabufuzi.
Majambere yasazeewo okuyita banna NRM ba waggulu okubadde Michael Ssebalu okuzzaamu abantu amaanyi, era Ssebalu n'abasaba okulonda pulezidenti Museveni ayongere okutereeza ebyenfuna by'eggwanga, naabasaba obutaswaza Majambere, Lubaga bayiire pulezidenti Museveni akalulu awangulire waggulu.