ABANTU abasoba mu 500 e Kawempe basaze eddiiro okuva mu NUP ne beesogga NRM.

ABANTU abasoba mu 500 e Kawempe basaze eddiiro okuva mu NUP ne beesogga NRM.
BANNAKIBIINA kya NUP, mu Kawempe abasoba mu 500, basaze eddiiro ne beegatta ku kibiina ekiri mu buyinza ekya NRM ne bategeeza nti balabye ekitangaala ne basalawo bakigoberere.
Bano bakungaanidde ku Maryland gardens e Kawempe, okubadde abavubuka, abasajja n’abakazi ne balangirira mu butongole nti beegasse ku NRM nga tebakakkiddwa.

Ndase ng'ayogera n'abamu ku basaze ekubo, ku ddyo ye Gray Genius ayasaze ekubo.

Ebirayiro by’okudda mu NRM babikoledde mu maaso g'omukungu okuva mu maka g'obwapulezidenti Faisal Ndase akulira pulogulamu ya Youth Wealth Creation Program, ng’eno yatandikibwawo okukwasizaako abakola emirimu gy’awansi era ng’ewagirwa avunaanyizibwa ku maka g’obwapulezide Jane Barekye.
 Pain Waswa okuva mu Kawempe North omu ku basaze eddiiro okudda ku NRM agambye nti pulogulamu ya Youth Wealth Creation ekulirwa Ndase, yamulaga nti gavumenti ya pulezidenti Museveni ekyalina omutima ogulumirirwa omuntu wa wansi era n'ategeeza nti ye nsonga lwaki baasazeewo okudda mu NRM basobole okuwagira pulezidenti Museveni mu bujjuvu.

Ndase ng'ayogera eri abasaze ekubo

Gray Genius, naye asaze ekkubo agamba nti okuwagira NUP babadde bakikola lwa kubeerabira ng’abavubuka naye okuva Ndase ne banne bwe baababakakasizza nti bagenda kubabeereramu balina basazeewo okudda ku ludda oluli mu buyinza kubanga lwe balaba olusobola okubatuusa ku kituufu. Ndase bano mu butongole abaaniriza mu kibiina, ne bamukwasa kaadi z'ekibiina kya NUP gye bavudde ne ngoye ze babadde bambadde oluvannyuma n'abambaza emijoozi gya kyenvu egy'ekibiina kya NRM.
Abategeezezza nti bakoze okusalawo okutuufu, era n'abakubiriza bogerezeganye ne banaabwe babalage ebirungi ebiri mu NRM nabo bakyuuke kubanga mu NRM mwemuli essanyu.

Ndase ng'ayambaza omu ku bakazi abaasaze ekkubo omujoozi gwa NRM

Amyuka RCC wa Kawempe, Jenifer Ssanyu Nasimbwa bano abategeezezza nti nga ye omukyala wakubeerawo abalere era basobola okuganyurwa mu nteekateeka za gavumenti endala