Abavubuka ba NRM mu Lubaga bali mu keetalo ka kwaniriza Pulezidenti Museveni ku Monday

Abavubuka ba Lubaga North beebugira kukyala lwa pulezidenti Museveni e Kitebi ku mmande, bagamba nabo balaba nga Muzeeyi yasaanidde.
Bano nga bakulembeddwaamu ssentebe w'abavubuka ba ggombolola y'e Lubaga Andrew Wasajja Mawuba, bakungaanidde e Lusaze nebayisa ebivvulu ebikunga n'okulanga okujja lwa pulezidenti Museveni e Kitebi ku mmande nga January 5, 2026.

Abavubuka be Lubaga balinze pulezidenti Museveni

Wasajja agamba nti, basazeewo okukunga abavubuka bonna okubeegattako okwaniriza pulezidenti Museveni, okusiima ebirungi byakoledde eggwanga omuli okuteekawo pulojekiti ez'enjawulo ezijja abantu mu bwavu omuli n'okukulaakulanya abavubuka.

Beegattiddwaako Singh Katongole akwatidde ekibiina Kya NRM bendera ku bubaka bwa paalamenti obwa Lubaga North.
Ono yeebazizza abavubuka okulaba omusana nebaagala pulezidenti Museveni naabasaba okweyiwa ku ssomero lya Kitebi PS ku mmande baamwanirize mu ssanyu. 

Naabasaba ku luno okubeera abeegendereza, balonde bulungi abakulembeze abalina obusobozi abanaabagasa, baleme okutwalibwa omuyaga nga bwegwali mu kulonda okuwedde.

Abavubuka ba NRM mu Lubaga nga bawera okuyiira Mzee akalulu

Oluvannyuma abakulira abasiraamu mu Lubaga North nga bakulembeddwaamu disitulikiti Khazi wa Kampala Sheikh  Hussein Ssekajja bakungaanidde mu maka ga Singh Katongole e Lungujja okumusabira mukama amuyise obulungi mu kulonda okubindaabinda n'obuwanguzi.
Sheikh Ssekajja Asabye bannayuganda okukuuma emirembe mu kulonda, kubanga Uganda ejja kusigalawo oluvannyuma lw'okulonda nti kale kikyamu okugyonoona. Naabasaba okulonda abakulembeze abo beebalabamu embala ekulaakulanya n'okutwala eggwanga mumaaso nga Singh Kayongole.
Oluvannyuma abavubuka bayisizza ebivvulu nga bwebakunga bannaabwe okujja mu bungi ku ssomero lya Kitebi PS ku mmande okwaniriza muzeeyi mu ssanyu