Abaserikale bakoze bulungibwansi e Kamuli ne basaba abantu okukuuma emirembe

ABASERIKALE ba poliisi e Kamuli , beenyigidde mu kuyonja ekibuga nga beera enguudo, obutale n'okugogola emyala, ng'omu ku kaweefube w'okunyweza enkolagana n'omuntu wa bulijjo.

Enteekateeka eno, yeetabyemu abaserikale abasoba mu 500, nga bakulembeddwa omuduumizi wa poliisi mu Busoga North SSP Dickens Bindeeba ng'ali n'abakulira poliisi eziri mu kitundu ekyo.

(Akatambi k'abaserikale abaabadde bayonja ekitundu)

Bindeeba, ategeezezza nti ekigendererwa, kwe kukuuma obuyonjo mu bantu era nga balamu bulungi, okwongera okukolaganira awamu , okubagumya nti bakyagenda mu maaso okubakuuma n'ebintu byabwe, akalulu ne bwe kanaabeera kawedde.

Omwogezi wa poliisi mu kitundu kino, Samson Lubega, annyonnyodde nti , babasabye okuloopa abantu abakyamu mu bitundu, n'okwewala obutabanguko mu maka.

Baabasabye okubeera abakkakkamu mu kiseera ky'okulonda , okugondera ebiragiro by'akakiiko k'ebyokulonda n'okwewala enjawukana olw'ebyobufuzi.