Poliisi yaakanoonyereza ku misango 66 egy'obunyoolagano bw'ebyobufuzi

EMISANGO gy'obunyoolagano mu by'obufuzi 66 , gye gyakanoonyerezebwako poliisi, okuva kampeyini lwe zaatandika mu kitundu kya Busoga East.

Muno, mulimu disitulikiti y'e Namayingo, Bugweri, Namutumba, Iganga, Bugiri ne Mayuge.

Emisango gino, mulimu okulwanagana, okuyuza ebipande, okukozesa olulimi oluvvoola n'okuvuma, okugezaako okugulirira abalonzi, n'okulemwa okugondera ebiragiro eby'akakiiko k'ebyokulonda.

Omwogezi wa poliisi mu Busoga East, Micheal Kasadha, ategeezezza nti  abo , ababeera batamatidde, baddembe okweyongerayo ku poliisi ezibeera zibasingako.

Asabye bannabyabufuzi n'abawagizi baabwe, okubeera abakakkamu mu zino ennaku ezibulayo , okutuuka ku kulonda.