Abagenda okulondesa mu Wakiso babanguddwa ku nkozesa y'obuuma bwa  Biometric Voters Verification

ABAGENDA okulondesa mu disitulikiti ye Wakiso babanguddwa kungeri gyebagenda okukozesaamu obuuma obwaatereddwawo akakiiko k’ebyokulonda obugenda okuyisibwa ku buli mulonzi nga tannaba kusuula kalulu.
Obuuma buno obuyitibwa Biometric Voters Verificatiob Kit (BVVK) bwatereddwawo akakiiko k’ebyokulonda okulaba nga bongera amaanyi mubwerufu eri abalonzi ssaako okujjawo oluvuvuumo nti waliwo abalonda okusukka mumulundi ogumu.
Akulira eby’okulonda mu disitulikiti ye Wakiso, Tolbert Musinguzi yagambye nti obuuma buno bugenda kuyamba kumutendera ogusooka mubifo ewalondebwa ng’abalonzi tebannaba kusuula kalulu.

Abamu ku bagenda okulondesa nga bayiga enkozesa y'akuuma ka BVVK

Yannyonnyodde nti omuli gwabo kwekwekebejja oba oyo agenze okulonda ali ku lukalala lw’abo abalina okulonda, okujjawo embeera yabo abetaba mukulonda ate nga tebaayita mukwewandiisa okugenda ku lukalala.
“Obuuma buno era bugenda kutuyamba nnyo okutangira abo abayinza okwagala okulonda emirundi egisukka mu gumu, okukakasa akalulu akawereddwa omulonzi nti kekatuufu ssaako n’okulaba ntibuli mulonzi awereddwa akalulu kamu.” Musinguzi bweyayongeddeko.
Yategezezza nti oluvannyuma ng’abantu bamaze okukuba akalulu, akuuma ka BVVK kagenda kuyamba okukakasa nti obululu obulondeddwa bwebwo obwaatekeddwawo kumakya okutangira embeera y’obutali bwerufu.
Okusinziira ku Musinguzi, abalonzi 1,455,000 bebagenda okulonda mubifo 2452 ebilondebwamu mu Wakiso, era nannyonnyola nti obululu bwonna obugenda okukubibwa mu Wakiso bwatusiddwa ku ofiisi z’ebyokulonda e Wakiso.
Mukutendekebwa kw’abagenda okulondesa e Wakiso okwabadde ku ssomero lya St Micheal International School, Musinguzi yagumizza abalonzi nti buli kifo ewalondebwa baataddewo obuuma bubiri nga mukino baagaseeko n’abakugu abagenda okubutereeza singa bufunamu obuzibu.