Abalokole baagala amagye gaddaabirize ekkanisa yaabwe gye gaayonoona

ABALOKOLE b’ekkanisa ya Glad tidings esangibwa mu disitulikiti y’e Nakasongola bawanjagidde eggye lya UPDF libayambe liddaabirize ekkanisa yaabwe ne kaabuyonjo bye bagamba nti byayonooneddwa ennyonyi z’amagye bwe zaabadde mu kwegezaamu gye buvuddeko.

Kigambibwa nti ennyonyi ya nnamunkanga okuva mu nkambi ya UPDF e Nakasongola eriko ekikompola kye yasuula mu butanwa ne kiviirako ekkanisa ya Glad tidings okufuna enjatika ate yo kaabuyonjo y’ekkanika n’esigala ku ttaka.

Glad tidings yeesudde mmayiro ttaano okuva ku nkambi y’amagye ey’e Nakasongola. 

Okusooka, abalokole nga bakulembeddwaamu Paasita waabwe, Isma Semyalo baali batiisatiisa okukuba gavumenti mu mbuga nga bavunaana amagye okukozesa obulagajjavu ne boonoona ekkanisa yaabwe.

Okusinziira ku Paasita Semyalo, bino nga byakagwawo yatuukirira abanene mu magye e Nakasongola ne balaga nti ensonga ebakutteko kyokka n’okutuusa leero tafunanga buyambi bwonna.

Semyalo yategeezezza nti okuva bino lwe byagwawo, ekkanisa yaabwe terina kaabuyonjo ng’ate bali mu kutya olw’ekkanisa yaabwe okufuna enjatika.

Omwogezi w’enkambi y’amagye e Nakasongola, Muhammad Mukisa yagumizza abalokole nti amagye meetegefu okubalongooseza ekkanisa ne kaabuyonjo, ssinga kinaakakasibwa nti ge gaabyonoona.

Ate ye akulira bambega mu nkambi y’amagye e Nakasongola, Lt. Joseph Mugabi yagambye nti waakwesitula agende yekkaanye ensonga eno, oluvannyuma afulumye alipoota enzijuvu.