Poliisi eyigga abaasazeeko omuvuzi wa bbooda obulago ne baleka omulambo mu kirombe

POLIISI e Luweero, ekyagenda mu maaso n'okuyigga abatemu, abaasaze agambibwa okuba omuvuzi wa bbooda obulago, omulambo ne baguleka mu kirombe kya bbulooka.

Ettemu lino, libadde ku kyalo Kavule mu ggombolola y'e Kikyusa mu disitulikiti y'e Luweero, abazigu bwe basse omusajja, omulambo gwe ne bagusuula mmita nga 10 okuva awabadde pikipiki ye nnamba UEQ 569U Bajaj.

Abadde asaliddwa obulago, era ng'aliko ebiwundu eby’amaanyi ku mutwe ne ffeesi ng'ekigendererwa ky'abatemu, tekinnamanyika kubanga pikipiki  bagireseewo.

Omwogezi wa poliisi mu Savanna, Sam Twiineamazima, ategeezezza nti batutte embwa ezikonga olusu, naye nga tebalina kya maanyi kye bazudde , era okunoonyereza kugenda mu maaso.